මේ වන තෙක් අයදුම් කර ඇති තැපැල් ඡන්ද දායකයින් සංඛ්‍යාව තුන් ලක්ෂයකට ආසන්න වන බව අතිරේක මැතිවරණ කොමසාරිස් එම්.එම්. මොහොමඞ් මහතා සඳහන් කළේය.
කෙසේ වෙතත් ජාතික මැතිවරණයකදී තැපැල් ඡන්ද අයදුම්පත් හත් ලක්ෂයක් පමණ වාර්තා වීම සාමාන්‍ය තත්වයකි. එහෙත් හෙට දිනයෙන් තැපැල් ඡන්ද අයදුම් කිරීම අවසන් වීමට නියමිතව තිබියදීත් තැපැල් ඡන්ද දායකයින්ගේ අඩු උනන්දුව කැපී පෙනන බව ඔහු කියා සිටියේය.
මේ වන විට ආරක්ෂක අංශ සාමාජිකයින්ගෙන් බහුතරය තැපැල් ඡන්ද සඳහා අයදුම්පත් යොමු කර තිබේ. ගුරුවරුන්ගෙන් ජනාධිපතිවරණයට අදාළව ලැබී ඇති තැපැල් ඡන්ද අයදුම්පත්වල පැහැදිලි අඩුවක් පෙන්නුම් කරන බව මැතිවරණ මහ ලේකම් කාර්යාලය සඳහන් කරයි.
මේ අතර ජනාධිපතිවරණයට අදාළව තැපැල් ඡන්ද අයදුම්පත් යොමු කිරීමට ලබාදී ඇති කාලසීමාව හෙට මධ්‍යම රාති‍්‍රයෙන් අවසන්වේ. කිසිඳු හේතුවක් මත එම කාලසීමාව දීර්ඝ නොකරණ බවයි මැතිවරණ මහ ලේකම් කාර්යාලය පවසන්නේ. එබැවින් කොළඹ දිස්ති‍්‍රක්කයේ තැපැල් ඡුන්ද අපේක්ෂකයින්ට මැතිවරණ මහ ලේකම් කාර්යාලය වෙත පැමිණ සිය අයදුම්පත් ලබා දෙන ලෙසද මැතිවරණ මහ ලේකම් කාර්යාලය ඉල්ලීමක් කර ඇත. තැපැල් මගින් අයදුම්පත් යොමු කිරීමේදී මතුවිය හැකි අපහසුතා වළක්වා ගැනීම මෙහි අරමුණය.
මේ අතර ජනාධිපතිවරණයේ පූර්ව සමයට අදාළව පැමිණිලි 18ක් තමන් වෙත වාර්තා වී ඇතැයි මැතිවරණ මහ ලේකම් කාර්යාලයේ පැමිණිලි ඒකකය පවසනවා. ඒ අතරින් පොදු පැමිණිලි නවයක් ලැබී ඇති අතර පැමිණිලි 3 ක් වාර්තා වී ඇත්තේ කොළඹ දිස්ති‍්‍රක්කයෙනි.
කැෆේ සංවිධානය වෙතද පූර්ව මැතිවරණ සමයට අදාළ පැමිණිලි නවයක් වාර්තා වී ඇත.
