මෛත්‍රීපාල සිරිසේන මහතා විසින් එම මාධ්‍ය ආයතන 4 ට එරෙහිව පැවරූ නඩුවකින් කළ එම අතුරු ඉල්ලීම ප්‍රතික්‍ෂේප කිරීමට විනිසුරුවරිය තීරණය කළේ දෙපාර්ශ්වයේම නීතිඥවරු ඉදිරිපත් කළ කරුණු සලකා බැලීමෙන් අනතුරුවය.
සිරිසේන මහතා සිය පැමිණිල්ලෙන් කියා සිටියේ තමා 2009 වසරේදී යුධ ජයග්‍රහණය සමඟ හා ශ්‍රිලනීපයේ ලේකම්වරයා ලෙස පැවැත්වූ එම කතාව මේ ජනාධිපති මැතිවරණයේදී තමාට එරෙහිව ප්‍රචාරක අවියක්‌ ලෙස යොදා ගැනීම හා නැවත විකාශනය කිරීම ජනාධිපති අපේක්‍ෂකයන් විසින් පිළිපැදිය යුතු බවට මැතිවරණ කොමසාරිස්‌ නිකුත් කළ උපදෙස්‌ උල්ලංඝනය කිරීමක්‌ බවයි.
සිරිසේන මහතා කළ කතාව රාජ්‍ය නාලිකාවල වැඩසටහන් ලෙසත් අනෙකුත් නාලිකා ඔස්‌සේ මුදල් ගෙවා පළ කළ දැන්වීමක්‌ ලෙසත් විකාශනය කෙරෙයි.
ජනාධිපති නීතිඥ රොනල්ඩ් පෙරේරා මහතා සිරිසේන මහතා වෙනුවෙන් පෙනී සිටි අතර ජනාධිපති නීතිඥ අලිසබ්රි ක්‌වේරා ද සොයිසා ඇතුළු නීතිඥවරු පිරිසක්‌ විත්ති පක්‍ෂයට පෙනී සිටියහ.
මෙම නඩුව ජනවාරි 05 වැනිදා යළි කැඳවීමට ද නියම කෙරිණි. ජනාධිපතිවරණය පැවැත්වෙන්නේ ජනවාරී 08 වනදා වන අතර ජනාධිපතිවරණ ප්‍රචාරක කටයුතු 05 වනදා රාත්‍රී 12න් පසු තහනම්ය. මෙවැනි කාරණාවක් සම්බන්ධයෙන් ඉක්මන් හා සදාචාර සම්පන්න විනිශ්චයක් අධිකරණය ලබා දිය යුතු වුවත් ඒ පමාකිරීම වාසි වන්නේ අවනීතියටය.අයුක්තියටය.අසාධාරණයටය.
