කණගාටුව ප්‍රකාශ කිරීම
පසුගියදා දෙරණ වාද පිටිය තුලදී ඇතිවූ අවාසනාවන්ත සිදුවීම පිළිබඳව මේ වන විට මාධ්‍ය මඟින් කථා බහට ලක්වෙමින් තිබේ.රුපවාහිනී නාළිකාවක සජීවී වැඩසටහනකදී කථා කළ යුතු භාෂාව, කතා විලාශය ඒ තුල තිබිය යුතු සංයමය විනය හා ඉවසීමේ ගුණය ඉතා වැදගත්ය.
නමුත් එහිදී හරීන් ප්‍රනාන්දු මන්ත්‍රීවරයා විසින් කතා කල හා හැසිරුණු ආකාරය එම වැඩසටහන නැරඹු ප්‍රේක්ෂකයන් හොඳාකාරවම දනී.මා එහිදී ඉවසිය යුතු වූවත් පෘථග්ජන පුදගලයෙකු ලෙස එහිදී මා හැසිරුණු ආකාරය මඟින් වැඩසටහන අවසාන විරාමය තුලදී ඇතිවූ කණගාටුදායක තත්වය කෙසේවත් අනුමත කල නොහැකි බව මා විශ්වාස කරමි.
විපක්ෂය විසින් චෝදනා කරනුයේ දයාසිරි ජයසේකර බලය ලැබුණු පසු බලය අයුතු ලෙස භාවිතා කරමින් හැසිරෙන බවයි.දයාසිරි ජයසේකර විපක්ෂයේ සිටියදීත් ජනතාව වෙනුවෙන් ජනතාවගේ පාර්ශවයේ සිට කටයුතු කල පුද්ගලයෙකි.එමෙන්ම විපක්ෂයේ සිටියදී අපි පරමාදර්ශී චරිත ගැන කතා කළා.වර්තමානයේ ආණ්ඩු පක්ෂයේ සිටියදීද දයාසිරි ජයසේකර කිසි දිනක කිසි මොහොතක බලය,නිලය අයුතු ලෙස භාවිතා කර නොමැත.මා ලැබූ ප්‍රධාන අමාත්‍ය ධූරය කිසි දිනක ජනතා පීඩක අවියක් ලෙස භාවිතා කර නොමැත.
එම රුපවාහිනී සංවාදයේදී හරීන් හරිද දයාසිරි හරිද යන්නට වඩා එම සිදුවීමේදී තමා ආණ්ඩු පක්ෂ දේශපාලනඥයෙකු ලෙස ජනතාවට වග කියන,ජනතා පරමාධිපත්‍යට හිස නමන පුද්ගලයෙකු ලෙස එම ඇතිවූ සිදුවීම සම්බන්ධව රටේ ජනතාවගෙනුත්, විශේෂයෙන්ම වයඹ ජනතාවගෙනුත් සමාව අයදිමි. එමෙන්ම එම සිදුවීම සම්බන්ධව මා දැඩි ලෙස කම්පාවට සහ දැඩි වේදනාවට පත්වී සිටිමි.
වයඹ ප්‍රධාන අමාත්‍යවරයා ලෙසත්,අධ්‍යාපන ඇමතිවරයා ලෙසත් දරුවන්ට ආදර්ශයක් වීම පිළිබඳව සිතා බැලීමේදී මෙම සිදුවීම මඟින් මාගේ හදවතේ දැඩි වේදනාවක් හටගෙන තිබේ.දරුවන් ඉදිරියට ගොස් ආදර්ශයන් දීම පිළිබඳව කතා බහ කිරීමේදී මෙම සිදුවීම මාගේ හදවතට සදාකාලික රිදුම් දීම වලකා ලිය නොහැකි වනු ඇත.
එකිනෙකාට මාධ්‍ය මඟින් චෝදනා කරගන්නවා වෙනුවට ජනතාවාදී දේශපාලනඥයෙකු ලෙසත්,ආණ්ඩු පක්ෂ දේශපාලනඥයෙකු ලෙසත් මා කල්පනා කරනුයේ සිදුවූ සිදුවීම කිසි ලෙසකින්වත් ජනතාව අනුමත නොකරන බවයි,කවුරුන් විසින් හෝ අපහාස උපහාස කළත් ඒවා ඉවසීමේ ගුණය දේශපාලනඥයෙකු තුල තිබිය යුතු බව මා තරයේ විශ්වාස කරන අතර,මීට වඩා වගකීමකින් හැසිරිය යුතු බවද මා විශ්වාස කරමි.
එබැවින් එම සිදුවීම සම්බන්ධව මා දැඩි ලෙස කණගාටුවට පත්වන අතර , ඒ සම්බන්ධව ජනතාවගෙන් සමාව අයදිමි.
මෙයට
නීතිඥ දයාසිරි ජයසේකර
වයඹ පළාත් ප්‍රධාන අමාත්‍ය
