මෙම යානය නෙදර්ලන්තයේ ඇම්ස්ටර්ඩෑම් සිට මැලේසියාවේ ක්වාලා ලම්පූර් නුවර බලා ගමන් කරමින් පැවති MH17 නමැති මැලේසියානු ගුවන් යානය බව හඳුනාගෙන ඇති අතර, මැලේසියානු ගුවන් සේවය පවසන්නේ ඇම්ස්ටර්ඩෑම් සිට ගුවන්ගත වූ යානයේ සබඳතාව බිඳ වැටෙමින් යානය අතුරුදන් වූ බවයි.

යානය අවසන් වරට පැවතී ඇත්තේ යුක්රේනයට ඉහළිනි.

රුසියානු ගුවන් සීමාවට ඇතුළු වීමට විනාඩි 20කට පෙර භූමියේ සිට ගුවනට එල්ල කරන BUK මිසයිලයක් අඩි 33,000ක් ඉහළින් ගමන් කළ ගුවන් යානයට එල්ල කර ඇති බව විශ්වාස කළ හැකි බව යුක්රේන අභ්‍යන්තර කටයුතු අමාත්‍යාංශය කියයි.

සැහැල්ලු ගුවන් යානා, කෘස් මිසයිල සහ ඩ්‍රෝන යානා ඉලක්ක කරමින් ප්‍රහාර එල්ල කිරීමට සැලසුම් කළ මිසයිලයක් ලෙස මෙය සැලකෙයි.

රුසියාවේ මොස්කව් බලධාරීන් පෙන්වා දෙන්නේ නැගෙනහිර යුක්රේනයේ කඩා වැටුණු ගුවන් යානයක් ගිනිගෙන දැවෙන අයුරු තමන් නිරීක්ෂණය කළ බවයි.

කෙසේ වෙතත් යානය රුසියානු ගුවන් සීමාවට පැමිණීමට අපොහොසත් වී ඇති බව ඔවුන් වැඩිදුරටත් පවසයි.

පසුගිය මාර්තු 08 වැනිදා මැලේසියානු ගුවන් සේවයට අයත් MH370 යානය අතුරුදන් වූ අතර, යානය පිළිබඳ මෙතෙක් තොරතුරක් වාර්තා නොවීම මහා අභිරහසක්ව පවතී.

කෙසේ වෙතත්, කඩා වැටී ඇති යානය ගමන් කරමින් පැවති කලාපය යුක්රේනයේ ගැටුම් පවතින කලාපයක් වන අතර, රුසියානු හිතවාදීන් විසින් මෙම කලාපයේදී යුක්රේන ගුවන් හමුදා යානා වෙඩි තබා බිම හෙළා තිබුණි.

මේ තත්ත්වය තුළ මෙම යානයද රුසියානු හිතවාදීන් විසින් බිම හෙළා ඇති බවට යුක්රේන ජනාධිපතිවරයාද සැක පළ කර තිබේ.