කැබිනට් තීරණ දැනුම් දීමේ මාධ්‍ය හමුවේදී අමාත්‍ය රාජිත සේනාරත්න මහතා ඊයේ පැවසුවේ පරිසර අධ්‍යයන වාර්තා සැලකිල්ලට ගෙන මෙම ව්‍යාපෘතිය ඉදිරියටත් සිදුකර ගෙන යන බවය.
එහිදී ඔහු පැවැසූවේ, අගමැතිතුමා මේකෙදි ඉදිරිපත් කළා පරිසර වාර්තාවක්. එහි තිබෙනවා මුහුද ගොඩකිරීම සම්බන්ධව. එහි ප්‍රශ්නයක් නැහැ. දෙවැනි EI එකක් අවශ්‍යයි ගොඩබිමේ ඉතුරු සංවර්ධන වැඩ කටයුතු සදහා. ඒක නැහැ. එතුමා කීවා චීන රජයත් අනවබෝධයක් ඇති නොවන පරිදි මේක කරන්න අවශ්‍යයි කියලා. අනිත් දේ තමයි ජනාධිපතිතුමා මාර්තු මාසයේ චීනයට යනවා. මෙය දිගටම කරගෙන යන අතරේ අඩුපාඩු ටික සකස් කරගමු. යනුවෙනි.
එහෙත් ජනාධිපතිවරන සමයේදී මෙම ඉදිරිකිරීම නතර කරන බව රනිල් වික්‍රමසිංහ මහතා පැවැසූ බව මාධ්‍යවේදීන් ප්‍රශ්න කිරීමේදී ඇමැති සේනාරත්න මහතා පැවැසූවේ එයා එහෙම එකක් කීවානම් එක එයාගෙන් අහගන්න ලෙසය. එහෙත් මේ සම්බන්ධයෙන් කැබිනට් අනුමැතියක් ලබා ගෙන නොමැති බවද මේ සම්බන්ධයෙන් අගමැතිවරයා විශේෂ ප්‍රකාශයක් අද දින සිදු කරන බවත් දැන ගැනීමට තිබේ.
කෙසේවෙතත් පරිසර සංරක්‍ෂණ භාරයේ අධ්‍යක්‍ෂ සජීව චාමිකර මහතා පැවසුවේ මෙම ව්‍යාපෘතිය හේතුවෙන් පරිසරයට දැඩි හානියක් සිදුවන බවය.
මේ පිරවීම් කටයුතු සදහා මුහු වැලි ලබා ගන්නවා. ඒ ලබා ගන්නේ නොගැඹුරු මුහුදු තිරයෙන්. මසුන් බෝවෙන කලාප වලින් තමයි වැලි ලබාගන්නේ. පොම්ප මගින් ලබා ගැනීම සිදු කරනවා. එතනදී ප්‍රධාන වශයෙන්ම මත්ස්‍ය බෝවන කලාප දැවැන්ත වශයෙන් හානියට පැමිණ තිබෙනවා. ගෝල්ෆේස් ප්‍රදේශයේ සිට පානදුර ප්‍රදේශය දක්වා සහ මිගමුව ප්‍රදේශයටත් මුහුදු ඛාදනය වැඩි වෙමින් පවතිනවා.
පරිසර සහ ස්වභාදහම් අධ්‍යයන මධ්‍යස්ථානයේ ජාතික සම්බන්ධීකාරක රවීන්ද්‍ර කාරියවසම් මහතාද නිවේදනයක් නිකුත් කරමින් සදහන් කරන්නේ ව්‍යාපෘතිය සිදුකරන චීන සමාගම රටවල් රැසක සිදුකළ ව්‍යාපෘතිවලදී දැවැන්ත පරිසර විනාශයක් සිදුකළ සමාගමක් බවය.
