මේ විධායක ජනාධිපති ධුරය කෙසේ හෝ ඉවත් කළ යුතු බවත් රාජපක්ෂත්, රාජපක්ෂ පවුලත්, රාජපක්ෂ කල්ලියත් රට විනාශකාරී ගමනකට ඇදගන ගොස් ඇති බවත් ඔහු පැවසුවේය. මහජනයාගේ දේපළ හොරා කා නාස්ති කර අවභාවිතයේ යොදවා ඇති ප්‍රමාණය හෙළිවෙමින් පවතින බවත් හිටපු ජනාධිපතිගේ අන්තිම මාස එක හමාරේ කෑම බිල කෝටි 15 ½ ක් බවත් අනුර කුමාර මහතා පැවසුවේය.
එහිදී වැඩිදුරටත් අදහස් දැක්වූ ඔහු මෙසේද පැවසීය.
''දැන් රජයේ වාහන හම්බෙනවා තැන් තැන්වලින්, මේවා ඉඳි කටුද? පාර්ලිමේන්තුවේදී මම ඇහුවා ජනාධිපති ලේකම් කාර්යාලයේ වාහන කීයක් තියෙනවාද කියලා.රනිල් වික්‍රමසිංහ කියනවා දන්නේ නෑලු, සුමනදාසගෙන් අහන්නලු. දැනට වාහන 1503 ක් රාජපක්ෂ පාවිච්චි කරලා තියෙනවා. පවුලේ ඥාතියෝ, ලේකම්ලාට වාහන බෙදලා දීලා. දැන් මහජනතාව අහනවා මේ හොරකම් ගැන කියනවා විතරයි දඬුවම් දෙන් නැද්ද කියලා.''
අපරාධ පරීක්ෂණ දෙපාර්තමේන්තුවට නියෝග ලබා දෙන්නේ ජෝන් අමරතුංග, නීතිපති දෙපාර්තමේන්තුවට නියෝග ලබා දෙන්නේ විජේදාස රාජපක්ෂ, ජනාධිපති විමර්ශන ඒකකයට නියෝග ලබා දෙන්නේ මෛත්‍රීපාල සිරිසේන. ඔවුන් තම වගකීම නිසි ආකාරව ඉටු කරන තුරු, වංචාවේ දූෂණ යෙදුණ අයට දඬුවම් ලබා දීම වෙනුවෙන් කළ හැකි උපරිම බලපෑම සිදු කරන බවත් ඔහු පැවසුවේය.
