එවැනි නිරීක්ෂණ චාරිකාවලට මහජනතාව විරුද්ධ වන්නේ ද ඒ නිසා බව මිනුවන්ගොඩ ඊයේ පැවති උත්සවයකදී අමාත්‍යවරයා කියා සිටියේය.
කෙසේවෙතත් ගම්පහ දිස්ත‍්‍රික්කයට ද නිරීක්ෂණ චාරිකාවක් සඳහා පැමිණෙන්නැයි විපක්ෂයේ කණ්ඩායම්වලට ආරාධනා කරන බව අමාත්‍ය බැසිල් රාජපක්ෂ මහතා මෙහිදී පැවසිය.
මේ අතර ඊයේ (18) පැවැති මාධ්‍ය හමුවකට සහභාගී වෙමින් එක්සත් ජාතික පක්ෂයේ පාර්ලිමේන්තු මන්ත‍්‍රීවරුන් කියා සිටියේ, රාජ්‍ය ආයතනවල තමන් කරන නිරීක්ෂණ වළක්වාලීමට ආණ්ඩුව විවිධ උත්සහයන් දරන බවයි. එහෙත් තමන් තවදුරටත් එවැනි නිරීක්ෂණ චාරිකාවල යෙදෙන බව ඔවුන් පැවසුහ.
හම්බන්තොට දී පිස්තෝලවලින් එම ගමන නතර කිරීමටත්, නොරොච්චෝලේදී මල්මාලාවලින් එම ගමන නතර කරන්නටත් ඒ සියල්ල අසාර්ථක වූ පසු තම හෙන්චයියලාට මත්පැන් පොවා ගේට්ටුවසා තෙල් පිරිපහදුවට යාමට නතර කිරීමට ආණ්ඩුව කටයුතු කළ බවත් ගම්පහ දිස්ත්‍රික් පාර්ලිමේන්තු මන්ත්‍රී අජිත් මාන්නප්පෙරුම මහතා එහිදී පැවසීය.
පෙරේදා (17) සපුගස්කන්ද තෙල් පිරිපහදුව නීරීක්ෂණය කිරීම සදහා ගිය එජාප පාර්ලිමේන්තු කණ්ඩායමට මුහුණ දීමට සිදුවූ සිදුවීම සම්බන්ධයෙන් අදහස් දක්වමින් එබව සඳහන් කළ මන්ත්‍රීවරයා වැඩිදුරටත් සදහන් කොට සිටියේ, ඛනිජ තෙල් සංස්ථාව දිනකට ලක්ෂ 218ක පාඩුවක් ලබන බවත් දිනකට ණය වාරික ලෙස ලක්ෂ 11,479 ක අතිවිශාල මුදලක් ගෙවන බවත් ය. ඒ අතර තුර සෑම ඉන්ධන ලීටරයකටම රුපියල් 25ක බද්ධක් ජනතාවගෙන් අය කරගන්නා බවත් තෙල් සංස්ථාවේ සිදුවන මේ සියලු අකටයුතුකම් වසා ගැනීමට ආණ්ඩුව ජනතාව රවටන බවත් ඔහු පවසා සිටියේය.
