මෙම අලි පැටවා දෙව්රම්වෙහෙරට භාර දී තිබුණේ අත්තනගල්ල මහේස්ත‍්‍රාත් අධිකරණයේ නියෝගයක් අනුවය. කෙසේ වෙතත් අදාළ අලි පැටවා නැවත ඇත් අතුරු සෙවණට රැගෙන යන්නැයි ගම්පහ මහාධිකරණය ඊයේ නියෝග කළේය.
ඒ අනුව, පන්නිපිටිය දෙව්රම් වෙහෙරේ නිසි අවසරයකින් තොරව රඳවාගෙන සිටි අලි පැටවා වනජීවි නිලධාරීන් විසින් අධිකරණ නියෝගයක් මත රැගෙන ගියේය.
එහිදී කෙරුණු මෙහෙයුම සම්බන්ධයෙන් කරුණු දැක්වූ බස්නාහිර පළාත් සහකාර වනජීවී අධ්‍යක්ෂ ඩබ්ලිව්.ඞී. ඉන්ද්‍රජිත් මහතා, " ගම්පහ මහ අධිකරණ නියෝග මත පන්නිපිටිය දෙව්රම්වෙහෙර පූජනීය ස්ථානයට ගිහිල්ලා එම ස්ථානයේදී මෙම නඩුවට අවශ්‍ය අලිපැටවා බාර අරගෙන ඊයේ රාත‍්‍රීය පුරා ප‍්‍රවාහනය කරමින් අද අලුයම උඩවලව ඇත් අතුරු සෙවණට ගෙනවිත් භාර දුන්නා.... " යයි පැවසිය.
වනජීවී නිලධාරීන් විසින් අදාළ අලි පැටවා භාර ගන්නා අවස්ථාව ආවරණය කිරීම සඳහා මාධ්‍යවේදීන් පිරිසක් ද පන්නිපිටිය දෙව්රම්වෙහෙරට ගොස් සිටි අතර ඔවුනට දැඩි බාධාවන්ට මුනදිමටද සිදුවිය.
එම මාධ්‍යවේදීන්ට එහිදී ගල්මුල් ප‍්‍රහාරයකට ලක් වූ අතර පොලිස් ප‍්‍රකාශක ජ්‍යෙෂ්ඨ පොලිස් අධිකාරී අජිත් රෝහණ මහතා පැවසුවේ එම එක් සැකකරුවෙකු දැනටමත් අත්අඩංගුවට ගෙන සිටින බවයි.
"පන්නිපිටිය දෙව්රම්වෙහෙර විහාරස්ථානයේ සිටි අලි පැටවෙකු වනජීවී නිලධාරීන් භාරයට ගෙන තිබෙනවා.... මේ අවස්ථාව ආවරණයට ගිය මාධ්‍යවේදියෙකුට පුද්ගලයෙකු විසින් ගලකින් පහර දී තිබෙනවා... ඒ පුද්ගලයා අත්අඩංගුවට ගෙන මහරගම පොලිසියේ රදවා තිබෙනවා.. ඔහු අද ගංගොඩවිල අධිකරණයට ඉදිරිපත් කිරීමට නියමිතයි... " යයි ඔහු වැඩිදුරටත් පැවසිය.
