අධිකාරිය මෑතක දී ආරම්භ කළ අන්තර් ජාල ගවේෂණ ඒකකය මගින් දැනටමත් හත් දෙනකු අත් අඩංගුවට ගෙනීමට සමත් වූ බව ජාතික ළමා රක්ෂක අධිකාරියේ සභාපතිනිය අනෝමා දිසානායක මහත්මිය පැවසුවාය.
ඔවුන් අතර විශ්ව විද්‍යාල මහාචාර්යවරයකු, ක්‍රීඩා උපදේශකයකු, සහ රජයේ දෙපාර්තමේන්තුවක හා පරිගණක ආයතනයක වැඩ කරන පුදගලයන්ද සිටින බව ඇය ප්‍රකාශ කළාය.
තවත් 30 දෙනකු සමඟ අන්තර් ජාල ගවේෂණ ඒකකය සම්බන්ධකම් පවත්වන බවත් ඔවුන්ද තොරතුරු සනාථ වුවහොත් නොබෝ දිනකින් අත් අඩංගුවට ගැනීමට හැකිවනු ඇති බවත් ඇය පැවසුවාය.
2500 ක් පමණ පුද්ගලයන් අපයෝජනය කිරීම සඳහා ළමුන් පොලඹවා ගැනීමට අන්තර් ජාලය ඔස්සේ උත්සාහ දරන බව අනාවරණය කර ගෙන ඇති බවත් සභාපතිනිය දිසානායක මහත්මිය ප්‍රකාශ කළාය.
නමගිය පුද්ගලයන්
මේ පිරිස් ශ්‍රී ලංකා සමාජයේ ඉහල නිල තල දරන පුද්ගලයන් බව ඇය සඳහන් කළාය.
අන්තර් ජාල ගවේෂණ ඒකකයේ නිලධාරීන් ළමුන් ලෙස පෙනී සිටිමින් ළමයින් සමඟ අන්තර්ජාලයේ පණිවිඩ හුවමාරු කරගනිමින් ඔවුන් හඳුනා ගැනීම සිදුකෙරෙන බව ඇය සඳහන් කළාය.
වසර 2000 දී පමණ ජාත්‍යන්තර කම්කරු සංවිධානයේ ආධාර ඇතිව ආරම්භ කළ අන්තර් ජාල ගවේෂණ ඒකකය මගින් එම වකවානුවේදී ළමුන් පොලඹවා ගැනීමට තැත් කළ විදේශිකයන් අත්අඩංගුවට ගත්තත් දැන් අන්තර්ජාල පහසුකම් වර්ධනය වීමත් සමඟ ශ්‍රී ලාංකිකයන් ඊට වැඩි වශයෙන් යොමුව ඇති බව ඇය කියා සිටියා ය.
අපචාරවලට ග්‍රහණය කර ගත් අවස්ථා ගැන තොරතුරු ඇත්දැයි විමසූ විට ඇය පැවසුවේ ළමුන්ගෙන් මෙතෙක් පැමිණිලි ලැබී නැති නමුත් ළමුන්ට සිදුවූ හිරිහැර ගැන ලැබුණු පැමිණිලි සලකා යළිත් අන්තර් ජාල ගවේෂණ ඒකකය ක්‍රියාත්මක කළ බවයි.
(බිබිසි සංදේශය)
