තැන්පත්කරුවන්ගේ මුදල් ආපසු ලබාදීමේ ක්‍රමවේදය ලබන සිකුරාදා මහ බැංකු අධිපති අර්ජුන් මහේන්ද්‍රන් මහතා ප්‍රමුඛ මහ බැංකු නිලධාරී හමුවේදී සැකසීම සිදු වනු ඇතැයිද ඇමැතිවරයා විශ්වාසය පළ කළේය.
මුදල් ඇමැතිවරයා හා ගෝල්ඩන් කී තැන්පත්කරුවන්ගේ හමුවක් ඊයේ (23) උදේ මුදල් අමාත්‍යාංශයේදී පැවැත්විණි. එම හමුවෙන් පසුව මාධ්‍යයට අදහස් දැක්වූ ඇමැතිවරයා පසුගිය රජයේ ආර්ථික කළමනාකරණ ක්‍රමයේ තිබූ වැරදි අඩු පාඩු නිසා මූල්‍ය ආයතන කඩා වැටුණා. ඒ නිසා මූල්‍ය ආයතනවල තැන්පත්කරුවෝ අමාරුවේ වැටුණා. අපි මේ ආයතන ප්‍රධානීන් හා තැන්පත්කරුවන් හමු වී මේ ගැන කථා කළා.
තැන්පත්කරුවන්ගේ මුදල් නිසි ක්‍රමවේදයක් අනුව ආපසු ගෙවන්න සූදානම්. අපි ඒ අනුව නඩු මගට උසාවි යන්න ඕනෑ නැහැ. ඉතා සුහදව කතා බහ කර මේ ප්‍රශ්නය විසඳ ගන්න මුදල් අමාත්‍යාංශය, මහ බැංකුව, එහි නිලධාරීන් සහ සියලු දෙනා පියවර ගන්නවා.
ගෝල්ඩන් කී තැන්පත්කරුවෝ සමඟ පැවැති සාකච්ඡාවේදී විශාල පිරිසක් මුදල් ආපසු ලබා ගන්නා ක්‍රමවේදයට එකඟ වූ අතර ඒ පිළිබඳ ඔවුන් සෑහීමකට පත්වී තිබෙනවා.
මේ අයගේ මුදල් ආපසු ලබා දෙන්න බැරි නිසා ප්‍රශ්නය උග්‍ර වුණා. නමුත් අපි මෛත්‍රීපාල සිරිසේන ජනාධිපතිතුමාත්, අගමැති රනිල් වික්‍රමසිංහ මහතාත් මේ ප්‍රශ්නය විසඳනවා කිව්වා. ඒ වගේම නව රජය පිහිටුවා අපි ඒ දේ ඉටු කළා යැයි ද ඇමැතිවරයා සඳහන් කළේය.
මෙම සාකච්ඡාවට මුදල් අමාත්‍යාංශයේ ලේකම් ආචාර්ය ආර්.එච්.එස්. සමරතුංග, මහ බැංකු අධිපති අර්ජුන මහේන්ද්‍රන් යන මහත්වරු එක්ව සිටියහ.
- dinamina
