එහෙත් යම් අපරාධ නඩු කටයුත්තක්‌ සම්බන්ධයෙන් කිසියම් මන්ත්‍රීවරයකු පොලිස්‌ අත්අඩංගුවට ගැනීම වළක්‌වාලන ප්‍රතිපාදන කිසිවක්‌ පාර්ලිමේන්තු බලතල හා වරප්‍රසාද පනතේ අඩංගු නොවන බව කී කථානායකවරයා එවැනි අවස්‌ථාවක පාර්ලිමේන්තුවේ කථානායකවරයාට දැනුම්දීම සම්ප්‍රදායක්‌ ලෙස මෙපමණ කලක්‌ පවත්වාගෙන ආ බව පැහැදිලි වන බවද ප්‍රකාශ කළේය.
පාර්ලිමේන්තු මන්ත්‍රීවරයකුගේ වරප්‍රසාද සුරක්‌ෂිත කිරීම සඳහා මෙපමණ කලක්‌ සම්ප්‍රදායක්‌ ලෙස මෙය සිදුකළ බවද ඒ අනුව ඉදිරියේදීත් එසේ කළ යුතු බවද කථානායකවරයා ඊයේ පාර්ලිමේන්තුවේ කටයුතු ආරම්භයේදී නිවේදනය කරමින් කීවේය.
තිස්‌ස අත්තනායක මහතා පසුගියදා අත්අඩංගුවට ගත් අවස්‌ථාවේදී ඒ බැව් කථානායකවරයාට දැනුම්දී නැතැයිද මේ පිළිබඳ විපක්‌ෂනායක නිමල් සිරිපාල ද සිල්වා සභාවේ අවධානය යොමු කළ බවද කථානායකවරයා කීවේය.
යම් මන්ත්‍රීවරයෙක්‌ අත්අඩංගුවට ගනිද්දී ඒ බැව් කථානායකවරයාට දැනුම්දිය යුතුද නැද්ද යන්න පිළිබඳ මතයක්‌ ප්‍රකාශ කරන්නැයි අධිකරණ නියෝජ්‍ය ඇමැතිවරයාද ඉල්ලීමක්‌ කළ බව කී කථානායකවරයා ඒ පිළිබඳ පූර්වගාමී කථානායකවරුන් කටයුතු කළ ආකාරය පිළිබඳව අධ්‍යයනයක්‌ කළ බවද චමල් රාජපක්‌ෂ මහතා ප්‍රකාශ කළේය.
1953 අංක 21 දරන පාර්ලිමේන්තු බලතල හා වරප්‍රසාද පනතේ පළමු කොටසේ සඳහන් ආකාරයට එම පනත කඩකිරීමකදී හැර කිසිදු මන්ත්‍රීවරයෙක්‌ පාර්ලිමේන්තු රැස්‌වීමකට ගමන් කරද්දී හෝ රැස්‌වීමකට පැමිණ සිටියදී හෝ රැස්‌වීමකට සහභාගිවී පෙරළා පැමිණෙද්දී සිවිල් නඩුවලට විෂය විය හැකි යම් ණයක්‌ සම්බන්ධව එම මන්ත්‍රීවරයා සිරභාරයට ගැනීමට, රඳවා ගැනීමට හෝ හිරිහැර කරනු ලැබීමකට යටත් නොවන බව පැහැදිලිව දක්‌වා ඇතැයිද කථානායකවරයා කීය.
