පනස් හැවිරිදි ජෙයකුමාරි බාලේන්දිරන් හා 13 හැවිරිදි ඇගේ දියණිය විභූෂිකා බාලේන්දිරන් ශ්‍රී ලංකා ආරක්ෂක අංශ විසින් 2014 වසරේ මාර්තු මස අත්අඩංගුවට ගනු ලැබූ අතර ජෙයකුමාරි කළුතර බන්ධනාගාරයේත් ඇගේ දියණිය වවුනියාවේ පරිවාස භාරයේත් රඳවා සිටියි.
එල්.ටී.ටී.ඊ.යට සම්බන්ධ වී සිට 2009 මාර්තු 19දායින් පසු ශ්‍රී ලංකා හමුදාවන්ට භාරවූ ජෙයකුමාරිගේ 15 හැවිරිදි පුත්‍රයා භාරවීමෙන් පසු අතුරුදන් වීම නිසා තම පුත්‍රයා සොයා දෙන ලෙස ඉල්ලමින් උතුරේ එවැනිම සිය දරුවන් අහිමි වූ කාන්තාවන්ට ඇය නායකත්වය දෙමින් විරෝධතාවලට එක්වූ අතර පසුගිය පොදු රාජ්‍ය මණ්ඩලයීය නායක සමුළුවට පැමිණි බ්‍රිතාන්‍ය අගමැති ඩේවිඩ් කැමරන් වෙතද ඒ පිළිබඳව පැමිණිලි කර සිටියාය.
පසුව ශ්‍රී ලංකා හමුදාව විසින් ත්‍රස්තවාදීන්ට උපකාර කිරීමේ චෝදනා මත ඇය හා ඇගේ දියණිය 2014 වසරේ මාර්තු මස කිලිනොච්චිය ධර්මපුරම්හිදී අත්අඩංගුවට ගෙන මේ වන තෙක් චෝදනා ඉදිරිපත් නොකර රඳවාගෙන සිටී. ඇය මෙසේ රඳවාගෙන සිටීම නීති විරෝධී බවත්, දේශපාලන හේතු මත ඇය රඳවා සිටින බවත් පවසමින් ඇය රඳවා සිටීමට විරුද්ධව දේශීය හා ජාත්‍යන්තර සංවිධාන රැසක් එක්සත් ජාතීන්ගේ සංවිධානයට පවා පැමිණිලි කර තිබිණි.
2014 අප්‍රේල් මස 10 වැනිදා ශ්‍රී ලංකා හමුදාවන් විසින් වෙඩි තබා මරා දමන ලද උතුරේ එල්.ටී.ටී.ඊ. නව නායකයා ලෙස සැලැකූ ගෝපි නමැත්තාටත් "අප්පන් හා තේවියන්" නමැති සෙසු දෙදෙනාටත් නවාතැන් පහසුකම් සැලැසුවේ යැයි ජෙයකුමාරිට චෝදනා එල්ල විය.
කෙසේ වුවත් මෙම චෝදනා අධිකරණයට ඉදිරිපත් කරන්නට ශ්‍රී ලංකා ආරක්ෂක හමුදාවන් අසමත්ව ඇතැයි ඇය වෙනුවෙන් පෙනී සිටින සිවිල් සංවිධාන චෝදනා කරයි.
mawbima
