වසර 2013දී සකස් කරන ලද ක්‍රීඩා රෙගුලාසි හා ක්‍රීඩා සංගම්වල නිලතල දැරීමේ හැකියාවන් පිළිබඳ ක්‍රීඩා අමාත්‍යාංශය පසුගියදා නීතිපතිවරයාගෙන් කරන ලද විමසීමකට පිළිතුරක් ලෙස මේ තත්ත්වය පැහැදිලි කොට ඇතැයි දැනගන්නට ඇත.
මේ අනුව ක්‍රිකට්, මලල ක්‍රීඩා, හොකී, වුෂූ, රගර් ඇතුළු ක්‍රීඩා සංගම් ගණනාවක ප්‍රධාන නිලධාරීන්ට නැවැත එම නිලතලවලට පත්වීමට නොහැකිවනු ඇතැයි පැවසේ.
නීතිපතිවරයා කරන ලද දැනුම්දීමෙන් පවසා ඇත්තේ ක්‍රීඩා සංගමයක වසර 4ක කාලයක් නිලතල දැරූ අයෙකුට නැවැත එම ක්‍රීඩා සංගමයේ ප්‍රධාන තනතුරුවලට නාමයෝජනා ඉදිරිපත් කිරීමට හැකියාවක් නොමැති බවය. මේ තත්ත්වය මත බොහෝ සංගම්වල නිලවරණ මාර්තු 30වැනිදාට පෙර පැවැත්වීමේ හැකියාව අහිමිවීමට බොහෝසෙයින් ඉඩ තිබේ. වසර 4කට වඩා වැඩි කාලයක් සිටි ඇතැම් නිලධාරීන් මේ වනවිටත් නාමයෝජනා භාරදී ඇති බැවින් එම නාමයෝජනා සියල්ල අවලංගු කිරීමට සිදුවේ.
දැනටමත් නාමයෝජනා භාර ගෙන ඇති ක්‍රීඩා සංගම්වල වසර 4කට වඩා වැඩි කාලයක් නිලතල දැරූ අය සිටීනම් ඒ ගැන සොයා බැලීම ක්‍රීඩා අමාත්‍යාංශයේ විශේෂ කමිටුවකින් සිදු කිරීමට නියමිත බවද වාර්තා වේ.
ක්‍රීඩා සංගම්වල සභාපති, ලේකම්, උප සභාපති, උප ලේකම්, භාණ්ඩාගාරික හා උප භාණ්ඩාගාරික තනතුරු දැරූ අයට මේ නීතිය බලපානු ඇත. මේ නව පැහැදිලි කිරීම යටතේ සියයට 90කටත් වැඩි පිරිසකට ක්‍රීඩා සංගම්වල ප්‍රධාන තනතුරු අහිමිවනු ඇතැයි පැවැසේ. ක්‍රීඩා පරිපාලනයට අලුත් පිරිසක් මේ තුළින් එක්වීමේ ඉඩකඩ විවරව ඇත.
මෙම ඇතැම් ක්‍රීඩා සංගමයක වසර 8 ක් පමණ ඉහළම තනතුරු දරමින් වෙනත් කිසිවකුට එම පරිපාලන කටයුතුවලට ඉදිරිපත්වීමට ඉඩ නොදෙමින් පාතාල පාලනයක් ගෙන ගිය සංගම් නිළධාරීන් රැසක් සිටිති. ඉතා දූෂිත පාලනයක් ගෙන යමින් ක්‍රීඩාවෙන් තමන්ගේ බඩ ගෝස්තරය සොයා ගත් මෙම පිරිස් හිටපු ක්‍රීඩා ඇමැතිවරුන්ට පවා අල්ලස් දී ඔවුන්ගේ මතයට නංවාගැනීමට තරම් ප්‍රබල වී තිබිණි.
දිනමිණ ඇසුරෙණි
