මෙතෙක්‌ කරන ලද දේශීය හා ලෝක සෞඛ්‍ය සංවිධානයේ වාර්තා අනුව ඒකාන්තයෙන්ම රජරට වකුගඩු රෝගය ව්‍යාප්ත වන්නේ විෂ කාරකයන්ගෙන් දූෂණය වී ඇති රජරට පොළවේ භූගත ජලය සහ පොළවේ වැවෙන ආහාර බෝග ශරීර ගතවීම නිසයි. මේ නිසා තව වසර කීපයකදී රජරට මහපොළව පිරිසිදු වන්නට වහාම රසායනික පොහොර සහ කෘෂි රසායන පොළවට හෙළීම නවත්වා ඊට විකල්ප ක්‍රියාමාර්ග ගත යුතුයි. ගොවීන්ට සහනාධාර සපයමින් මහපොළවට විෂකාරක රසායනික පොහොර යෙදීමට ගොවියාට අනුබල දෙන්නේ රජයමයි. "ග්ලයිපොසේට්‌" වැනි වල් නාශක විෂකාරකයන් සහ තවත් කෘමිනාශක කීපයක්‌ තහනම් කර ඇති බව රජය පුන පුනා කීවත් එසේ තහනම් කළ කෘෂි රසායන අදටත් වෙළෙඳපළින් ලබාගත හැකියි. රජය රටට බොරු නොකර ජනතාවට ආදරේ නම් අවංකවම රසායනික පොහොර කෘෂිරසායන පොළවට යෙදීම වහාම නැවැත්විය යුතුයි. රටට වටින්නේ කෘෂි රසායන සමාගම්වලින් ලැබෙන ප්‍රතිලාභ ද? නැතහොත් රටේ පුරවැසි ජීවිතද? වෛද්‍ය චින්තක විඡේවර්ධන මහතා ප්‍රශ්න කරයි.
ගොවිතැනට යොදාගන්නා සියලුම කෘෂි රසායන නවත්වා ගොවීන්ට ඊට විකල්ප ක්‍රියාමාර්ග හඳුන්වා දිය යුතුයි. පොළව මතුපිට පවත්නා ගංගා, ඇළ- දොළ, වැව් ආදියේ ජලය පිරිපහදු කරමින් හැම ගමකටම හැම ගෙදරකටම ලබාදීමේ වැඩපිළිවෙළක්‌ පළාත් සභාව මුල්වී ක්‍රියාත්මක කළ යුතුයි. අධික වියදමක්‌ දරා රුධිර කාන්දුකරණය කළාට ඵලක්‌ නෑ. වසර හතර පහකදී රෝගියා මිය යනවා. ඒ විශාල මුදල් සම්භාරය වියදම් කොට ගමට ගෙදරට පිරිපහදු කළ පානීය ජලය ලබා දෙන්න. එවිට රෝග බෝවීමේ ව්‍යාප්තිය අඩුවී තව වසර කීපයකදී වකුගඩු රෝගීන් නැතිවී යන්න පුළුවන් යෑයි වකුගඩු පර්යේෂක වෛද්‍ය චින්තක විඡේවර්ධන මහතා මාධ්‍ය හමුවේදී වැඩිදුරටත් සඳහන් කළේය.
divaina
