මේ අනුව අල්ලස් හෝ දූෂණ විමර්ශන කොමිසම එම පුද්ගලයන්ට එරෙහිව 1988 අංක 74 දරන පනතින් සංශෝධිත 1975 අංක 01 දරන වත්කම් බැරකම් ප්‍රකාශ පනත යටතේ මහේස්ත්‍රාත් අධිකරණයේ නඩු පැවරීම සිදු කෙරේ.
වත්කම් බැරකම් ප්‍රකාශ පනතේ 9.(1) වගන්තිය ප්‍රකාරව මේ නඩු පැවරීම කරන අතර ඒ අනුව දඬුවම් නියම කිරීමක් ද සිදුකිරීමට නියමිතය. මේ පනත යටතේ අල්ලස් හෝ දූෂණ විමර්ශන කොමිසමේ අධ්‍යක්ෂ ජනරාල්වරිය ඊයේ (20) ශ්‍රී ලංකා මහවැලි අධිකාරියේ කොට්ඨාස නිලධාරිවරයකුට එරෙහිව කොළඹ ප්‍රධාන මහේස්ත්‍රාත් අධිකරණයේ පැමිණිල්ලක් ගොනු කළාය.
අදාළ පැමිණිල්ල අල්ලස් කොමිසමේ නීති නිලධාරි චන්ද්‍රසිරි මහතා මහේස්ත්‍රාත්වරයාට ඉදිරිපත් කරමින් කියා සිටියේ එම අධිකාරියෙන් ලැබුණු පැමිණිල්ලක් අනුව විමර්ශන පවත්වා මේ නඩු පැවරීම කැර ඇති බවය. කරුණු සලකා බැලූ ප්‍රධාන මහේස්ත්‍රාත් ගිහාන් පිලපිටිය මහතා සුගත් වීරසිංහ යන සැකකරුට අප්‍රියෙල් 24 දින අධිකරණයේ පෙනී සිටින ලෙසට නොතීසි නිකුත් ක‍ළේය.
dinamina
