මෑතකදී ඇප මත නිදහස් කරන ලද බාලේන්ද්‍රන් ජෙයකුමාරි කිලිනොච්චිය මහාදේව ළමා නිවාසයේ සිටින සිය දියණියව තමන් වෙත භාර දෙන්නයි ඉල්ලා අධිකරණයදී පෙත්සමක් ගොනු කර තිබුණි.

අදාල නඩුව විභාගයට ගෙන තිබූ අතර, ජෙයකුමාරි වෙනුවෙන් නීතීඥ එස්. විජයරානි, ම. කිරේසියන්, එන්. සුන්දර් සර්මා, එච්. රයිකාන්, එස්. දුස්යන්ති යන පිරිස අධිකරණයේ පෙනී සිටියෝය. එහිදී විබූසිකාව ළමා නිවාසයෙන් නිදහස් කර ඇයගේ මව වෙත භාරදෙන්නයි නීතීඥවරුන් ඉල්ලා සිටියෝය.

දැරියව මවට භාරදිය හැක්කේ ඔවුන්ව නිදහස් කර ඇතයි ත්‍රස්ත මර්දන ඒකකය විසින් විසින් ලිඛිතව දැනුම් දුන්නේ නම් පමණක් බවත් එතෙක් දැරියව ළමා නිවාසයෙන් නිදහස් කිරීමට නොහැකි බවත් අධිකරණ විනිසුරු පවසා තිබේ.

හමුදා අත් අඩංගුවට ගත් සිය පුත්‍රයා නිදහස් කරන ලෙස ඉල්ලා උද්ඝෝෂණය කළ ජෙයකුමාරිව පසුගිය රාජපක්ෂ පාලන සමයේදී පොලීසිය වෙත වෙඩි තැබීමක් සිදු කළැයි පැවැසෙන ගෝපි නැමැති එල්.ටි.ටි.ඊ. බුද්ධි අංශ සාමාජිකයාට (ඔහු හමුදා බුද්ධි අංශ සාමාජිකයකු බවද ඇතැම් වාර්තා වලින් කියැවිණි.) රැකවරණය ලබා දුන්නයි පවසා ත්‍රස්ත මර්දන අංශය විසින් අත් අඩංගුවට ගත්තේය. වසරකට පසු පසුගිය 10වැනිදා ඇප මත නිදහස් කර ඇත.

ඇයගේ දියණිය වන විබූසිකා පසුගිය වසරක කාලයක් කිලිනොච්චිය පිහිටි මහාදේවා ළමා නිවාසයේ රඳවා තබා සිටියි.