ඒ අනුව පෞද්ගලික අංශයේ සියලූ සේවකයින්ගේ අවම මාසික වැටුප රුපියල් දස දහසක් වන අතර අවම දෛනික වැටුප රුපියල් 400 ක්වේ. පෞද්ගලික අංශයේ සේවකයින්ගේ වැටුප රුපියල් 2500 කින් වැඩි කිරීමටද ඉකුත් අයවැයෙන් යෝජනා කෙරිණි. එහි පළමු පියවර වශයෙන් හෙට සිට පෞද්ගලික අංශයේ සේවකයින්ගේ දැනට පවතින වැටුප රුපියල් 1500 කින් වැඩි කරනු ඇත.

ඒ අනුව දෛනික වැටුප් ලබන සේවකයින්ගේ වැටුපද රුපියල් 60 කින් වැඩි කළ යුතු බව රජය පවසයි. දෙවන පියවර යටතේ වැටුප් වැඩිවීම ලබන වසරේ ජනවාරි මස පළමු වනදා සිට ක්‍රියාත්මක වන අතර එහිදී මේ වසරේ දෙසැම්බර් 31 වන දිනට ගෙවන ලබන වැටුප තවත් රුපියල් දහසකින් වැඩි කරනු ඇත.

ඉකුත් අයවැයෙන් යෝජනා කර ඇති ක්‍රමවේදය හා සමාන නීතියක් ගෙනඒමේ අවශ්‍යතාව සැලකිල්ලට ගෙන අදාළ කාර්යය සදහා ව්‍යවස්ථා කෙටුම්පත් කිරීම වෙනුවෙන් කම්කරු අමාත්‍යවරයා ඉදිරිපත් කළ යෝජනාවට කැබිනට් අනුමැතිය හිමිවද තිබේ. ඉහත සදහන් යෝජනා ක්‍රියාත්මක කිරිම සදහා වන විධිවිධාන එම පනත් කෙටුම්පතට ඇතුළත් වන බව පැවැසේ.