විධායක ජනාධිපති ධුරය අහෝසි කිරීමේ සටන් පාඨය පෙර පැවැති සෑම ජනාධිපතිවරණයකදීම කරළියට පැමිණියත් එය කතාවට පමණක් සීමාවූ අතර රට රැකීමට විධායක ජනාධිපති ධුරය අවශ්‍ය බව ද කීය.
ඉදිරියේදී පැවැත්වීමට නියමිත ජනාධිපතිවරණය ඉලක්ක කොට ගෙන විධායක ජනාධිපති ධුරය අහෝසි කළ යුතු බවට විපක්ෂය දැන් සිටම රටේ වැරැදි මතයක් ඇති කරමින් යන බව ද අගමැති දි. මු. ජයරත්න මහතා කීය.
විධායක ජනාධිපති ධුරය රටට අහිතකර බවට දැන් සිටම විපක්ෂය රටේ මතයක් ඇති කරනුයේ ඉදිරි ජනාධිපතිවරණයකදී එක්සත් ජනතා නිදහස් සන්ධානයේ ජනාධිපති ධුර අපේක්ෂකයාට මුහුණ දීමට නොහැකි නිසා බවත් පොදු අපේක්ෂකයකු ගැන විපක්ෂය සිහින මවන්නේ ද ඒ නිසා බවත් අගමැතිවරයා වැඩිදුරටත් පැවැසීය.
මේ රටේ සිටිනුයේ එකම පොදු අපේක්ෂකයකු වන අතර ඒ අන් කිසිවකු හෝ නොව මහින්ද රාජපක්ෂ ජනාධිපතිතුමායි. මේ රටේ සියලු දේශපාලන පක්ෂ සහ සියලු ජන කොටස් සමඟ සහයෝගයෙන් කටයුතු කරන එකම දේශපාලනඥයා ජනාධිපතිතුමා බවත් අගමැති තුමා අවධාරණය කළේය.
අගමැතිවරයා ඉහත කාරනා සඳහන් කර ඇත්තේ, සිළුමිණ පුවත්පත සමඟ පැවැති සාකච්ඡාවකදී ය.
