පසුගිය රාජපක්ෂ ආණ්ඩු සමයේ සෞඛ්‍ය අමාත්‍යවරයාව සිටි තමන් දැඩි මර්දනයකට ලක්ව සිටි බවත් හෙද නිලධාරීන්ගේ සංගමයේ සභාපතිවරයාව සිටි සමන් රත්නප්‍රිය මහතා තමන්‍ හමුවීමට දිනයක් ඉල්ලූවිට ඒ සදහා මාස ගණනකට එහා දිනයක් ලබා දීමට සිදුවූ බවත් එහිදීද හිටපු ජනාධිපතිවරයාට වගඋත්තර බැදීමට සිදුවූ බව ජනාධිපතිවරය‍ා පැවසුවේය.

'මිනිහ ආණ්ඩුවට විරුද්ධයි කියලා දන්නෙ නැද්ද? ඇයි දිනයක් දුන්නේ 'යනුවෙන් විමසන බවත් පැවසුවේය.

ඕනෑම රාජකාරියක් හෝ සේවයක් කිරීමට නිදහස් මනසක් පැවතිය යුතු බවත් වර්තමානය වන විට එවැනි නිදහස් වාතාවරණයක් උදාකර ඇති බවත් ජනාධිපතිවරයා සදහන් කළේය.

ලංකාවේ පවතින හෙද විද්‍යාල දැඩි අපහසුතා මධ්‍යයේ පවත්වා ගෙන යන බවත් හෙද අධ්‍යාපනය හා හෙද සේවය ගුණාත්මක කිරීම සදහා ඒවා අංග සම්පූර්ණ ලෙස භෞතික සම්පත්වලින් යුක්ත කළ යුතු බවත් ඒ සදහා තම උපරිම සහයෝගය ලබාදෙන බවත් ජනපතිවරයා පැවසුවේය.

ඉදිරි වර්ෂ 2 තුළ ලංකාවේ අංග සම්පූර්ණ හෙද විශ්ව විද්‍යාලයක් ආරම්භ කරන බවටද ජනාධිපතිවරයා මෙහිදී පොරොන්දූ වූයේය.

ඉදිරියේදී සංවර්ධනය වූ රටවලට පවා සේවය සැපයිය හැකි හෙද සේවයක් ලංකාවේ බිහි කිරීම උදෙසා කටයුතු සම්පාදනය කරන බවත් නිදහස් අධ්‍යාපනය හා නිදහස් හෙද සේවයක් ඇති කිරීම උදෙසා ගත හැකි සෑම පියවරක්ම ගන්නා බව ජනාධිපතිවරයා වැඩිදුරටත් පැවසුවේය.
මෙම අවස්ථාවට සෞඛ්‍ය අමාත්‍ය රාජිත සේනාරත්න මහතා, අගමැති රනිල් වික්‍රමසිංහ මහතා රජයේ හෙද නිලධාරීන්ගේ සංගමයේ සභාපති සමන් රත්නප්‍රිය මහතා ඇතුළු පිරිසක් සහභාගී වූහ.

මෙහිදී ලංකාවේ සෞඛ්‍ය සේවය වෙනුවෙන් සිදු කළ සේවය අගයමින් සම්මාන පිරිනැමීමක්ද සිදුවිය.

ජනාධිපතිවරයාගේ සම්පූර්ණ කතාව පහතින්

{soundcloud}https://soundcloud.com/lankadaily/2015-05-12-122246a{/soundcloud}

ඡායාරූප-නිශාන්ත ප්‍රියදර්ශන