මත්තල ඉදිරියට ගෙන යාම අභියෝගයක්ව පවතින බවත් මත්තල වන්තොටුපොළ නිසි ක්‍රමවේදයක් අනුව ලාභදායී ගුවන්තොටුපොළක් බවට පත් කරන බව සිවිල් ගුවන් සේවා ඇමැති රොජිනෝල්ඩ් කුරේ මහතා අවධාරණය කරයි .
ගුවන්තොටුපොළ ඉදිකිරීමට ගත් ණය ගෙවීමට තබා ගුවන්තොටුපොළ සේවකයින්ට වැටුප් ගෙවීමට වත් ආදායමක් ගුවන්තොටුපොළින් ලබා ගත නොහැකි බවද ඇමැතිවරයා පෙන්වා දුන්නේය .
අද වන විට මත්තල ගුවන්තොටුපොළට දිනකට එන්නේ එක් ගුවන් යානයකි . එය ෆ්ලයි ඩුබායි ආයතනයට අයත් විදේශීය ගුවන්යානයක් වේ .
මත්තල ගුවන්තොටුපොළ නඩත්තු හා අලුත්වැඩියා මධ්‍යස්ථානයක් ලෙස ලොවට හදුන්වාදීමටත් ප්‍රදේශයේ භාණ්ඩ අපනයනය කිරීමට අවශ්‍ය කටයුතු යෙදීමටත් අවධානය යොමුව ඇති බවත් ඒ සඳහා සැළසුම් සකස් කරමින් සිටින බවත් ඇමැතිවරයා කියා සිටියේය .
මත්තල ගුවන්තොටුපොළේ වැඩිපුර සේවකයන් සිටියත් වැඩ නැති බවත් කටුනායක වැඩ ඇතත් සේවකයන් නැති බවත් කී කුරේ මහතා මේ තත්ත්වය හදුනාගෙන මේ ගුවන්තොටුපොළවල් දෙකම දියුණු කිරීමට කටයුතු කරන බවත් දිනමිණ සමඟ අදහස් දක්වමින් කියා සිටියේය.
