ශ්‍රේෂ්ඨාධිකරණය මෙම නියෝගය නිකුත් කළේ එම සමාගම ශ්‍රේෂ්ඨාධිකරණයට ගොනු කර තිබූ මූලික අයිතිවාසිකම් පෙත්සමක්‌ සලකා බැලීමෙන් අනතුරුවයි.
රෝහිණී මාරසිංහ, බුවනෙක අළුවිහාරේ සහ උපාලි රත්නායක යන ත්‍රිපුද්ගල විනිසුරු මඬුල්ල හමුවේ පෙත්සම සලකා බැලිණි. පෙත්සමේ සඳහන් අන්දමට ඇමරිකානු ඩොලර් බිලියන 4 ක්‌ පමණ වැය කොට ආරම්භ කිරීමට සැලසුම් කළ මෙම සංවර්ධන ව්‍යාපෘතිය සඳහා ශ්‍රී ලංකා ආයෝජන මණ්‌ඩලය සමඟ එකී සමාගම 2012 වසරේදී ගිවිසුමකට එළඹී ඇත. සියලු කරුණු මැනවින් අධ්‍යයනය කිරීමෙන් අනතුරුව කර්මාන්ත පුරයක්‌ සඳහා එම ව්‍යාපෘතියට අමාත්‍ය මණ්‌ඩලයේ අනුමැතිය දී ඇති අතර ඊට පසුව පාර්ලිමේන්තුව විසින් ද මෙය අනුමත කර ඇත
විදුලිය, පොහොර, සීනි, වාහන නිෂ්පාදනය කිරීම ඇතුළු කර්මාන්ත රාශියක්‌ මෙහි ආරම්භ කිරීමට සැලසුම් කර ඇති අතර, ඉන් සෘජු රැකියා 5000 ක්‌ පමණ සැපයෙන අතර, අනියම් ආකාරයෙන් 20,000 කට පමණ ආර්ථික වශයෙන් සෙතක්‌ සැලසෙන බව ද පෙත්සම්කරු කියයි.
ශ්‍රී ලංකාවේ විශාලම කර්මාන්තපුරය සාම්පූර් හි පිහිටුවීම සඳහා හිටපු ජනාධිපතිවරයා විසින් ශ්‍රී ලංකා ආයොජන මණ්‌ඩලයට පැවරූ සාම්පූර් හි පිහිටි ඉඩම් ආපසු රජයට පවරා ගැනීම සඳහා වත්මන් ජනාධිපති ගත් තීරණය හේතු කොට ගෙන තම සමාගමට පමණක්‌ නොව මුළු රටටම විශාල පාඩුවක්‌ සිදුවන බවත් පෙත්සම්කරු පවසයි. මේ වන විට ගේට්‌වේ ඉන්ඩස්‌ට්‍රීස්‌ සමාගම ඒ සඳහා විශාල මුදලක්‌ වැය කර ඇති බවත්, ආයෝජන ගිවිසුම් රාශියකට අත්සන් කර ඇති බවත් වත්මන් ජනාධිපති ගත් නීති විරෝධී පියවර නිසා කිසිම විදේශ ආයෝජකයකු ශ්‍රී ලංකාවේ ආයෝජනය කිරීමට මින් ඉදිරියට ඉදිරිපත් නොවනු ඇති බවත් පෙත්සමේ වැඩිදුරටත් සඳහන් කර ඇත.
මෙතරම් විශාල සංවර්ධන කටයුත්තකට අත හිත තබපු තම සමාගම දැනුවත් කරන්නේවත් නැතිව ඉඩම් යළි රජයට පවරා ගැනීම අත්තනෝමතික, අසාධාරණ හිතුවක්‌කාර සහ සාධාරණ යුක්‌තියේ මූලධර්මවලට පටහැනි සහ ආණ්‌ඩුක්‍රම ව්‍යවස්‌ථාවෙන් සහතික කොට තිබෙන 12(11), 14 1(ජී) මූලික අයිතීන් උල්ලංඝනය කිරීමක්‌ හැටියට තීන්දු කරන ලෙසත් පෙත්සමෙන් ඉල්ලා ඇත.
ජනාධිපති නීතිඥ ගාමිණී මාරපන, ජනාධිපති නීතිඥ උදිත ඉහළහේවා, ජනාධිපති නීතිඥ සංජීව ජයවර්ධන, අධිනීතිඥ නවීන් මාරපන, අධිනීතිඥ රංග දයානන්ද යන මහත්වරු පෙත්සම්කාර ගේට්‌වේ ඉන්ඩස්‌ට්‍රීස්‌ සමාගම වෙනුවෙන් පෙනී සිටියහ.
ජනාධිපති නීතිඥ රොනල්ඩ් පෙරේරා ශ්‍රී ලංකා ආයෝජන මණ්‌ඩලය වෙනුවෙන් පෙනී සිටි අතර නියෝජ්‍ය සොලිසිටර් ජනරාල් පෙරියපුල්ලේ නීතිපති වෙනුවෙන් පෙනී සිටියේය.
ශේ්‍රෂ්ඨාධිකරණය ඊයේ (15 දා) නිකුත් කළ අතුරු නියෝගයකට අනුව පෙත්සම්කාර සමාගම විසින් බදුÊපදනම යටතේ ආයෝජන මණ්‌ඩලයෙන් ලබාගෙනඇති ත්‍රිකුණාමලයේ සාම්පූර් පිහිටි ඉඩම්වල අයිතියට බාධා කිරීම පෙත්සම් විභාගය අවසන් වන තුරු තහනම් කර ඇත.
divaina
