ඇමති ආරක්ෂක ඒකකය නිර්මාණය කර තිබෙන්නේ ඇමතිවරුන්ට, නියෝජ්‍ය ඇමතිවරුන්ට සහ ඇතැම් අවස්ථාවල පාර්ලිමේන්තු මන්ත්‍රීවරු සඳහා අවශ්‍ය ආරක්ෂාව සැලසීම සඳහායි.
බස්නාහිර පළාත් සභා මන්ත්‍රී හිරුණිකා ප්‍රේමචන්ද්‍ර මේ පිළිබඳ අදහස් දක්වමින් පවසන්නේ ඇයට ආරක්ෂාව සපයා ඇත්තේ අගමැතිවරයාගේ නියෝගයකට අනුව බවයි. තමන් මත්ද්‍රව්‍යවලට විරුද්ධව අරගල කරන නිසා තමන්ට ජීවිත අවධානමක් ඇතැයි හිරුණිකා පවසයි.
මීට අමතරව ජාතික සමගි පෙරමුණේ නායක අසාත් සාලි පවසන්නේ තමන් නිරන්තරයෙන් විරුද්ධ පාක්ෂිකයින් වෙවේචනය කරන නිසා තමන්ට ජීවිත තර්ජනයක් ඇති බවයි. මුල්ලේරියාව - කොටිකාවත්ත ප්‍රාදේශීය සභා මන්ත්‍රී ප්‍රසන්න සෝලංගආරච්චිටද විශේෂ ආරක්ෂාවක් සපයා ඇති බව වාර්තා වේ.
මේ පිළිබඳව අදහස් දක්වමින් පොලිස් මාධ්‍ය ප්‍රකාශක රුවන් ගුණසේකර පවසන්නේ පාර්ලිමේන්තු මන්ත්‍රීවරුන් සඳහා ලබාදෙන ඇමති ආරක්ෂාව විශේෂ ඉල්ලීමක් මත ප්‍රාදේශීය දේශපාලකයින්ටද ලබාදෙන බවයි. ඔවුන් විසින් කරන ඉල්ලීමට අනුව බුද්ධිඅංශය ලබාදෙන වාර්තාව සැළකිල්ලට ගෙන මෙම ආරක්ෂාව ලබාදෙන බවත් අවශ්‍ය ඕනෑම අවසථාවක් එය ඉවත් කිරීමේ හැකිව ඇති බවත් පොලිස් මාධ්‍ය ප්‍රකාශකවරයා පවසයි.
