ශ්‍රී ලංකා නිදහස් පක්ෂයට ආදරය කරන කිසිවකුට පක්ෂය බෙදා වෙන්කළ නොහැකි බව පෙන්වාදෙන ජනාධිපතිවරයා පක්ෂය දෙකඩ කිරීමට යම් අයකු උත්සාහ කරන්නේ නම් එය ද්‍රෝහී කමක් බව ද කියා සිටී. එහෙයින් ශ්‍රීලනිපයට ආණ්ඩුවක් පිහිටුවීම සඳහා සිංහල බෞද්ධ දමිළ මුස්ලිම් සියලු දෙනාගේ ඡන්ද අවශ්‍ය යැයිද ජනාධිපතිවරයා කීවේය.
ජනාධිපතිවරයා එසේ සඳහන් කළේ නුවරඑළිය නව නගර ශාලාවේ දී ඊයේ(21) පැවැති ශ්‍රී ලංකා නිදහස් පක්ෂයේ නුවරඑළිය දිස්ත්‍රික්ක නියෝජිත හමුවට එක් වෙමිනි.
වෙනම පෙරමුණු හදන්න කතා කරන පිරිස් ශ්‍රීලනිපයට ද්‍රෝහිකමක් කරන බවත් වාම ව්‍යාපාරයට ඔවුන් ද්‍රෝහිකමක් කරන බවත් ශ්‍රීලනිපය අසමඟිව කැඩී බිඳී සිටිය දී පැවැති මැතිවරණවලදී ජයග්‍රහණ ලබා ගෙන නොමැති බවත් ජනාධිපතිවරයා කීවේය.
පක්ෂයෙන් කිසිවෙක් වෙන් කරන්න කපා හරින්න තමාට කිසිඳු අවශ්‍යතාවක් නොමැති බව ද තමාට අවශ්‍ය සියලු දෙනා සමඟින් සහෝදරත්වයෙන් සමඟින් ශ්‍රිලනිප ආණ්ඩුවක් ගොඩනැඟීමට බව ද ජනාධිපතිවරයා අනාවරණය කළේය.
හිටපු ජනාධිපති චන්ද්‍රිකා බණ්‌ඩාරනායක මහත්මිය යුද්ධ කරමින් රට සංවර්ධනය කළ බවත් හිටපු ජනාධිපති මහින්ද රාජපක්‍ෂ මහතා මේ රටේ පැවැති යුද්ධය අවසන් කර රට සංවර්ධනය කරා ගෙන ගිය බවද ජනපතිවරයා කීය.
එහිදී ජනාධිපතිවරයා මෙසේද පැවසීය
මට කාවවත් කපන්න වුවමනාවක්‌ නැහැ. ශ්‍රී ලංකා නිදහස් පක්ෂය දිනවා රට දිනවීම මගේ එකම අරමුණයි. පක්ෂය දෙකඩ වීමට මම ඉඩ තියන්නේ නැහැ. ශ්‍රී ලංකා නිදහස් පක්ෂය වෙනුවෙන් උපරිම කැපකිරීම් කරන්න මම සූදානම්.
ශ්‍රී ලංකා නිදහස් පක්ෂයේ සැවොම එකට එකතු කිරීමට මගේ පැත්තෙන් සියලුම කැපකිරීම් කරනවා. ශ්‍රී ලංකා නිදහස් පක්ෂයේ සාමාජිකත්වය නොමැති අය මෙයට මැදිහත් වී පක්ෂය දෙකඩ කිරීමට, කඩාකප්පල්කාරී වැඩවලට ඉඩ නොදෙන ලෙසත් පාක්‍ෂිකයන්ගෙන් ඉල්ලා සිටිනවා. එසේම ශ්‍රී ලනිප සාමාජිකයන් තම තමන්ගේ කාර්යය, තමාගේ වගකීම් දැනගෙන කටයුතු කරන ලෙසත් ඉල්ලා සිටිනවා.
සෑම ජනාධිපතිවරණයකදීම පෙරමුණ හා සන්ධාන අපේක්‍ෂකයන්ගේ ප්‍රධාන පොරොන්දුව වූයේ විධායක ජනාධිපති ක්‍රමය අහෝසි කිරීමයි.
ශ්‍රී ලංකා නිදහස් පක්‍ෂ නායකයන් අවුරුදු 20 ක්‌ රට පාලනය කළා. එහෙත් විධායක ජනාධිපති ක්‍රමය අහෝසි කළේ නැහැ. පසුගිය ජනාධිපතිවරණයේදී රටේ ප්‍රගතිශීලී මධ්‍යස්‌ථ මතධාරීන් මට ඡන්දය දුන්නේ විධායක ජනාධිපති ක්‍රමයේ වෙනසක්‌ කරන බවට දුන් පොරොන්දුව නිසයි. මම ජනාධිපති වී කෙටි කලකදී විධායක ජනාධිපති ක්‍රමයේ බලතල සීමා කිරීමට හැකිවුණා. දින සියයේ මැතිවරණ ප්‍රකාශය අනුව ශ්‍රේෂ්ඨාධිකරණ මත විමසීමකට අනුව 18 වැනි සංශෝධනයෙන් ලබාදී තිබූ අසීමිත බලතල අහෝසි කළා.
19 වැනි සංශෝධනය තුළින් රටේ නිදහස, ප්‍රජාතන්ත්‍රවාදය, නීතියේ ස්‌වාධීනත්වය තහවුරු කිරීමට හැකි වුණා. නෙල්සන් මැන්ඩෙලා, මාඕ සේතුං, මහත්මා ගාන්ධි තම රටවල සමාජ පෙරළියක්‌ කළ නායකයන්. නෙල්සන් මැන්ඩෙලා වසර 27 ක්‌ හිරේ හිටියා. නිදහස ලැබී රටේ ජනාධිපතිවරයා වී රට ප්‍රජාතන්ත්‍රවාදී ප්‍රතිසංස්‌කරණවලට ලක්‌කොට වසර හතරකින් විශ්‍රාම ගියා.
එසේම චීනය, ඇමරිකාව, අප්‍රිකාව වැනි රටවල දේශපාලකයන් බලයේ සිටින්නේ ඉතා සීමිත කාලයයි. එවැනි අලුත් දේශපාලන දැක්‌මක්‌ රටට අවශ්‍යයි.
