ඇතුගල්පුර ජන මාධ්‍ය සංසදය මගින් සංවිධාන කරන ලද මාධ්‍ය හමුවකදී නියෝජ්‍ය අමාත්‍යවරයා මෙම තොරතුරු අනාවරණය කළේය. මාස්පොත , කෙළිමුණේ හෝටලයක දී පැවැති මෙම හමුවේදී තවදුරටත් අදහස් දැක්වූ ශාන්ත බණ්ඩාර මහතා මෙසේද සඳහන් කළේය.
මෙම භාණ්ඩ හා උපකරණ විධිමත් ටෙන්ඩර් පටිපාටියකට අනුව අදාළ ස්වයංරැකියාලාභීන්ගේ නමින්ම ලබා ගත් ඒවායි. ඒවා ස්වයංරැකියාලාභීන් අතර බෙදාදීමට නියමිතව තිබුණේ කුරුණෑගල දිස්ත්‍රික් සංවර්ධන කමිටුව මගින්.
එහෙත් එකී කමිටුව මාස හයකින් රැස්නොවීම නිසයි මෙම අවාසනාවන්ත තත්ත්වය උද්ගතවී ඇත්තේ. මෙය ජාතික අපරාධයක්. මෙම භාණ්ඩ හා උපකරණ මේ වනවිටත් මළකඩ කා කිසියම් ප්‍රමාණයක හානියකට පත්ව ඇති. මේවා බෙදාහැරීම තවදුරටත් ප්‍රමාදවුවහොත් කිසිදු පාවිච්චියකට ගත නොහැකි තරමට අබලන් වේවි. මම මේ සම්බන්ධයෙන් කුරුණෑගල දිස්ත්‍රික් ලේකම්වරයාගෙන් ද විමසා බැලුවා. එවිට ඔහු කියා සිටියේ මෙම කාර්යය දිස්ත්‍රික් සංවර්ධන කමිටුව සතු එකක් බවයි.
මම මෙම අපරාධය සම්බන්ධයෙන් ජනාධිපතිතුමන් වෙත සහ ස්වදේශ කටයුතු පිළිබද අමාත්‍ය ජෝෂප් මයිකල් පෙරේරා මහතා වෙතද කරුණු ඉදිරිපත් කර තිබෙනවා. මෙය තවදුරටත් ඉටුනොවන්නේ නම් ජනතාව සමග එක්වී දැඩි ක්‍රියාමාර්ගයක් ගැනීමට මා බලාපොරොත්තු වෙනවා.
dinamina
