වාර්ෂිකව දරුවන් 380,000 ක් පමණ උපත ලබන අතර ඔවුන්ගෙන් 6500 දෙනකු විවිධ වූ සංජනනීය ආබාධයන් වන ස්නායු, හෘද, මොළය ආශ්‍රිත ආබාධයන්ට ගොදුරු වන බව පවුල් සෞඛ්‍ය කාර්යාංශයේ වෛද්‍ය කපිල ජයරත්න මහතා පවසයි.
කාන්තාවන්ගේ අධික තරබාරු බව, ගර්භණී කාලයේදි ලබා දෙන ෆෝලික් ඇසිඩ් අම්ලය ලබා නොගැනීම, ජානමය ගැටලු යනාදි හේතුන් නිසා දරුවන් උපතින්ම ආබාධ වන බව ද ඒ මහතා පැවැසුවේය.
ඇතැම් විට ගැබිනි කාලයේදි ලබා ගන්නා ඖෂධ හේතුවෙන් ද විවිධ රෝගාබාධවලට ලක්ව මෙවැනි තත්ත්වයන් උදා වන්නේ යැයි ඔහු ප්‍රකාශ කළේය.
සංජානනීය ආබාධයන් වන මේ ආබාධයන් වළක්වා ගත හැකි වන අතර ඒවා වළක්වා ගැනීමට ගැබිනි මවුවරුන්ට උපදෙස් ලබා දීම සිදු කරන බව ද වෛද්‍ය ජයරත්න මහතා පැවැසීය. දරුවන්ගේ උපත් ආබාධ වළක්වා ගැනීම සඳහා මාතෘ සායනවලදී ගැබිනි මවුවරුන් දැනුවත් කිරීම ද, දකුණු පළාත ආශ්‍රිතව මේ සම්බන්ධයෙන් දත්ත එක්රැස් කිරීමට අඳාළව නියමු ව්‍යාපෘතියක් ක්‍රියාත්මක කරන බව ද ඒ මහතා කීය.
දකුණු පළාත ආශ්‍රිතව සිදු කරන නියමු ව්‍යාපෘතියේ සාර්ථකත්වය අනුව රට පුරා දත්ත රැස් කිරීම ඉදිරි කාලය තුළදී සිදු කරන බව ද ඔහු පවසයි. ශ්‍රී ලංකාවේ ළදරු මරණ අනුපාතිකය අඩු වී ඇති අතර එය සංවර්ධනයට හේතු වන බවත් උපත් ආබාධ වළක්වාගෙන ඒ සඳහා වැය කරන මුදල් සංවර්ධන කටයුතුවලට යොදා ගත යුතු බවත් ඒ මහතා පැවැසුවේය.
dinamina
