නිශ්ශංක සේනාධිපති මහතාට විදේශ ගතවීම තහනම් කරමින් අධිකරණය විසින් නිකුත් කර තිබූ නියෝගය තාවකාලිකව ඉවත් කරමින් අතිරේක මහෙස්ත්‍රාත්වරයා එම අවසරය ලබා දුන්නේය.

2015 ජනවාරි 8 දින හෝ ඊට ආසන්න දිනයකදී ගාල්ල නියෝජ්‍ය පොලිස්පතිවරයා වෙත ලද තොරතුරක් මත ගාල්ල වරායේ නැංගුරම්ලා තිබූ 'මහනුවර' නම් වූ නෞකාව ගාල්ල පොලිසිය විසින් පරීක්‍ෂා කර තිබූ අතර. එම නෞකාවේ කන්ටේනර් 22ක පමණ වූ අවි ආයුධ ප්‍රමාණයක් සොයා ගන්නා ලදී.

එම සිද්ධිය පිළිබඳව ගාල්ල පොලිසිය, ගාල්ල මහෙස්ත්‍රාත් අධිකරණය වෙත කරුණු වාර්තා කර තිබූ අතර, පසුව පොලිස්පතිවරයාගේ නියෝග පරිදි මෙහි පරීක්‍ෂණ කටයුතු රහස් පොලිසිය වෙත භාරදී තිබිණි.

මේ පරීක්‍ෂණයට අදාළව ඇවන්ගාඩ් මෙරිටයිම් පෞද්ගලික සමාගමේ සභාපති යාපා හෙට්ටි පතිරැන්නැහැලාගේ නිශ්ශංක යාපා සේනාධිපති යන අයගේ ගුවන් ගමන් 2015 ජනවාරි 23 වැනිදා සිට අධිකරණ නියෝග මත තහනම් කර තිබිණි.

නිශ්ශංක සේනාධිපති මහතා සිය නීතිඥවරුන් මාර්ගයෙන් අධිකරණය වෙත මෝසමක් ගොනු කරමින් ඊයේ දන්වා සිටියේ සිය ව්‍යාපාර සහ ව්‍යාපෘති සඳහා විදේශගත වීමට තමන්ට අවසර ලබාදෙන ලෙසයි.

සේනාධිපති මහතාගේ නීතිඥවරුන් අධිකරණයට කරුණු වාර්තා කරමින් කියා සිටියේ, තම සේවාදායකයාට ව්‍යාපාර කටයුතු සඳහා විදේශ ගතවීමට නොහැකි වුවහොත් මසකට ඩොලර් මිලියන 25ක පමණ මුදලක් රටට අහිමි වන බවත්, එමෙන්ම අදාළ ගිවිසුම් ක්‍රියාත්මක කිරීමට නොහැකි වුවහොත් ලාංකිකයන් 20,000කට පමණ විදේශ රැකියා අවස්ථා අහිමි වන බවයි.

නිශ්ශංක සේනාධිපති මහතා විදේශ ගතවීමට කරන ලද ඉල්ලීම සම්බන්ධයෙන් විරෝධතාවක් නොමැති බවට රහස් පොලිසියේ සමූහ මංකොල්ල විමර්ශන අංශයේ ස්ථානාධිපති පොලිස් පරීක්‍ෂක ඉලංගසිංහ මහතා වැඩිදුර වාර්තාවක් මඟින් ලිඛිතව අධිකරණය වෙත දන්වා සිටියේය.

නිශ්ශංක සේනාධිපති මහතා විදේශ ගතවීම කෙරෙහි ඊට අදාළ පරීක්‍ෂණ පවත්වන රහස් පොලිසියේද විරෝධයක් නොමැති හෙයින් ඊයේ (22දා) සිට ලබන සැප්තැම්බර් 21 දක්වා මාස 03ක කාලයක් විදේශ ගතවීමට අතිරේක මහෙස්ත්‍රාත්වරයා සේනාධිපති මහතාට අවසර ලබා දුන්නේය.
මේ සිද්ධියට අදාළ පැමිණිල්ල ලබන අගෝස්තු 6 වැනිදා කැඳවන ලෙසද අතිරේක මහෙස්ත්‍රාත් නිශාන්ත පීරිස් මහතා නියම කෙළේය.

mawbima