එක්සත් ජනතා නිදහස් සන්ධානයේ මහ ලේකම් සුසිල් ප්‍රේමජයන්ත මහතා විසින් නිමල් සිරිපාල ද සිල්වා මහතාගේ නම විපක්ෂ නායකවරයා ලෙස අනුමත කර ඒවා ඇති බවත් ඒ අනුව කතානායකවරයා සිරිපාල ද සිල්වා මහතා එම ධූරය සඳහා පිළිගෙන ඇති බවට නිවේදනය කර ඇති බවත් හෙතෙම කීවේය.
පාර්ලිමේන්තුවේ විපක්ෂ නායකවරයා කවුරුන්දැයි පත්කළ මන්ත්‍රී අනුර කුමාර දිසානායක මහතා ඇසූ ප්‍රශ්නයකට පිළිතුරු දෙමින් නියෝජ්‍ය කතානායකවරයා එසේ ප්‍රකාශ කෙළේය.
එක්සත් ජනතා නිදහස් සන්ධානයේ මහ ලේකම්වරයාට පමණක් එලෙස නම් කළ නොහැකි බවත් විපක්ෂයේ අනෙක් මන්ත්‍රීවරුන්ගෙන් ඒ පිළිබඳ විමසා නොසිටී බවට අනුර කුමාර දිසානායක මහතා පැවැසු අතර ඊට පිළිතුරු දෙමින් නියෝජ්‍ය කතානායකවරයා කියා සිටියේ කතානායකවරයාගේ නියෝග කිසිවකුට අභියෝගයකට ලක්කළ නොහැකි බවය.
රීති ප්‍රශ්නයක් මතුකරමින් කරුණු දැක්වු දිසානායක මහතා විපක්ෂයේ කොටස් දෙකක් සිටින බවත් ඔවුන්ගෙන් එක්තරා පිරිසක් පාර්ලිමේන්තුවේ එක් අයකුගේ නමක් විපක්ෂ නායකවරයා ලෙස පත්කරන්නැයි ඉල්ලා අස්සන් ලේඛනයක් කතානායකවරයාට බාරදුන් බවත් පාර්ලිමේන්තුව යන්නේ විපක්ෂ නායකවරයකු නොමැති එහෙත් විපක්ෂ නායකවරයා යැයි හදුන්වා ගත් කෙනෙකු සමඟ බවත් කීවේය.
ව්‍යවස්ථාදායක සභාව සඳහා විපක්ෂ නායකවරයාගේ නියෝජිතයින්ද පත් කරන බවත් මේ වන විට පාර්ලිමේන්තුවේ විකෘති තත්ත්වය නිසා එම පත්කිරීම්වලද ගැටුළු මතු වන බවත් දිසානායක මහතා ප්‍රකාශ කෙළේය.
දින සියයක් සඳහා මෙම පාර්ලිමේන්තුව තිබුනේ නම් ඔහේ ඔන්න කමක් නැහැ කියලා ඉන්න තිබුණා. නමුත් දැන් ඒ තත්ත්වය නැහැ. එම නිසා කළ යුත්තේ මේ පාර්ලිමේන්තුව විසිරුවන එක. සමහර මැති ඇමැතිවරු කියනව අද නෙවයි හෙට කියලා . මෙය හරියට බාලගිරි දෝෂය වගේ. දැන් තිබෙන්නේ විකෘති කරපු පාර්ලිමේන්තුවක්. කිසිවකුට කිසිවකු වග නොකියන පාර්ලිමේන්තුවක් යැයි දිසානායක මහතා කියා සිටියේය.
විපක්ෂයට කරගෙන යෑමට බැරි නම් පාර්ලිමේන්තුව විසුරුවා හරින්න යැයි සභානායක ලක්ෂ්මන් කිරිඇල්ල මහතා ප්‍රකාශ කළ අතර අනුර කුමාර දිසානායක මහතා විපක්ෂයේ නොව ආණ්ඩුවේ යැයි විපක්ෂ මන්ත්‍රිවරුන් ප්‍රකාශ කරන බව කිරිඇල්ල මහතා එහිදි කීවේය.
