වැඩිදුරටත් අදහස් දැකුවූ ගයන්ත කරුණාතිලක අමාත්‍යවරයා, මේ වනවිට සෑම රජයේ සේවකයෙක්ටම එදාට වඩා අද රුපියල් 10,000ක අමතර වැටුපක් ලැබෙනවා. පවුලේ රාජ්‍ය සේවකයන් දෙදෙනෙක් ඉන්නවනම් රුපියල් 20,000ක් ලැබෙනවා. ඒ වගේම විශ්‍රාමිකයන්ගේ රුපියල් මිලියනයක ස්ථාවර තැන්පතු සඳහා 15 පොලීයක් ලබාදීම අද සිද්දවනවා.
එම විශ්‍රාමිකයින් ලක්‍ෂ පහකට අධික ප්‍රමානයක් ඒ ප්‍රතිලාබය ලබනවා. මේ රටේ 14 ලක්‍ෂයක රාජ්‍යසේවකයින් අතරින් කිහිපදෙනකුගෙන් මහජන මුදල් අවභාවිතය පිලිබඳව ප්‍රශ්නකිරීම් කිහිපයක් කරපු එක තමයි මේ රාජ්‍ය සේවකයන්ට හිරිහැර කරනවා ප්‍රශ්න කරනවා කියලා මහා ලොකු චිත්‍රයක් හිටපු ජනාධිපති මහින්ද රාජපක්‍ෂ මහතා මවන්න උත්සාහ කරන්නේ. හැබැයි අපේ රටේ රාජ්‍ය සේවකයන් දන්නවා රුපියල් 10000ක වැටුප් වැඩිවීමක් කලේ අපි කියලා.
මැතිවරණයේ දුන් පොරොන්දු ඉටුකලේ කව්ද කියලා රාජ්‍ය සේවකයන් දන්නවා. ලක්‍ෂ 14න් කිහිපදෙනකුගෙන් මහජනමුදල් අවභාවිතාව පිලිබඳව ප්‍රශ්නකිරීම අපේ රජයේ වගකීමක්. ජනවාරි 8වනදා පැහැදිලි ජනවරමක් ජනතාව අපට ලබාදුනේනේ වංචාව දූෂණය හොරකම පිටු දකින්න. එවැනි දේවල් සොයල බලවන්න. අපිදන්නවා පසුගිය ජනාධිපතිවරණය සමයේ හරියට තමන්ගෙ බූදලයක් කියල හිතාගෙන ජනාධිපතිවරණය කාලයේ මහජන මුදල් භාවිත කරමින් බඩු බෙදාදීම් සිදුකලේ. දැන් ඒවා පිලිබඳ ප්‍රශ්න කිරීමට සිද්දවෙලා තියෙනවා.
ඒවට නියෝග දුන්නෙ කොහෙන්ද කොයි විදිහටද උපදෙස් ලැබුනෙ කියන එක පිලිබඳ ඇතැම් නිළධාරීන්ගෙන් ප්‍රශ්න කරන්න සිදුවෙලා තියෙනවා. උපදෙස් දුන්නෙ කව්දකියල හෙලිදරව්කරගන්න පුළුවන් වෙන්නෙ එතකොටයි.
ඒ නිසා කිසිම නිළධාරියෙකුට රාජ්‍ය සේවකයකුට හිරිහැරකරන අනවශ්‍ය බලපෑම් කරන ආණ්ඩුවක් නෙවෙයි ඔවුන්ගේ සුභසාධනය සහ ඔවුන්ගේ ජීවන තත්වය පිළිබඳව කල්පනාකරපු ආණ්ඩුවක් රාජ්‍ය සේවා කොමිෂන් සභා පවා ස්ථාපිත කරන්නට ස්වාධීන කොමිෂන් සභා ඇතිකරන්නට ක්‍රියාකරපු ආණ්ඩුවක් බව ඒ හිටපු ජනාධිපතිවරයාට මතක්කරල දෙන්න ඔන.
