එහෙයින් ජාත්‍යන්තර රාජ්‍ය නොවන සංවිධානවල මෙවැනි ආකාරයේ ක්‍රියාකාරකම් සම්බන්ධයෙන් සැකයෙන් යුතුව බැලීමට සිදුව තිබෙන බවද සඳහන් කළ ඇමතිවරයා,  ජාතික ආරක්ෂාව සම්බන්ධයෙන් යම් ගැටලුවක් ඇති වන්නේ නම් ඒ සම්බන්ධයෙන් සොයා බැලීම රජයේ වගකීම යැයි ද පෙන්වා දුන්නේය.

ඇමැති කෙහෙළිය රඹුක්වැල්ල මහතා මේ බව පැවසුවේ ජාත්‍යන්තර රාජ්‍ය‍ නොවන සංවිධාන මෙරටදී පවත්වන මාධ්‍ය වැඩමුළු තහනම් කිරීමට රජය ගෙන තිබෙන තීරණය සම්බන්ධයෙන් ඇමැති මණ්ඩල තීරණ දැනුම්දීම සඳහා ඊයේ (31) පැවති  මාධ්‍ය හමුවේදී මාධ්‍යවේදීන් මතු කරන ලද ප්‍රශ්නවලට පිළිතුරු දෙමිනි. 

ජාත්‍යන්තර රාජ්‍ය නොවන සංවිධානවල කටයුතු සම්බන්ධයෙන් රජය ගත් තීරණයෙන් යම් පාර්ශ්වයකට අගතියක් වී තිබෙන්නේ නම් ඒ සම්බන්ධයෙන් ඔවුනට නීතිමය පියවර ගැනීමට පූර්ණ නිදහස සහ අවස්ථාව තිබෙන බවත් ඇමැතිවරයා පැවැසීය.

ජාත්‍යන්තර වශයෙන් ක්‍රියාත්මක රාජ්‍ය නොවන සංවිධානවල ක්‍රියාකාරකම් සම්බන්ධයෙන් රජය අනුගමනය කරන ක්‍රියාමාර්ග සම්බන්ධයෙන් අමෙරිකානු තානාපති කාර්යාලය කනස්සල්ල පළ කර තිබීම ගැන කළ විමසුමකට පිළිතුරු දුන් ඇමැතිවරයා පැවැසුවේ ගාසා තීරයේ සහ ජෙරුසලමේ සිය ගණන් වැසියන් මරුමුවට පත්වීම ගැන තමන් කනගාටු වන බවත් එහෙත් ඒ සම්බන්ධයෙන් කිසිවක් කළ නොහැකි බව අමෙරිකානු විදේශ ලේකම්වරයා ප්‍රකාශයක් කර තිබෙන හෙයින් අමෙරිකානු තානාපති කාර්යාලයේ කනස්සල්ල ගැන එතරම් සැළකිල්ලක් යොමු කිරීම අවශ්‍ය නොවන බවයි.


වසර තිහක අති දැවැන්ත යුද ගැටුමක් අවසන් කර තිබෙන අවස්ථාවක ජාතික ආරක්ෂාව සම්බන්ධයෙන් දැඩිව අවධානය යොමු කිරීම අත්‍යවශ්‍ය කරුණක් වන බවත් ජාත්‍යන්තර වශයෙන් ක්‍රියාත්මක රාජ්‍ය නොවන සංවිධාන මෙරටට පැමිණ කරන කටයුතු සම්බන්ධයෙන් සොයා බැලීම අත්‍යවශ්‍ය යැයිද ඇමතිවරයා කිය.

විශේෂයෙන් ම මෙවැනි ඇතැම් සංවිධාන ජනවාර්ගික පදනම මත පිරිස් තෝරා ගෙන සර්ව ජන ඡන්ද බලය ක්‍රියාත්මක කිරීම සම්බන්ධයෙන් පමණක් නොව ඡන්දය පාවිච්චි කළ යුත්තේ කාටදැයි යන්න පවා කියා දීමට කටයුතු කර තිබෙන බවද ඔහු පෙන්වා දුන්නේය.

රජයේ ප්‍රවෘත්ති අධ්‍යක්ෂ මහාචාර්ය ආරියරත්න ඇතුගල මහතා ද මේ අවස්ථාවට සහභාගී විය.