කෙසේ නමුත් පොරොන්දු දීමට වඩා පොරොන්දු ඉටු කිරීමට කල් ගතවන හෝ එබදු පොරොන්දුවක් නොදුන්නාසේ සිටීම බොහෝ දේශපාලඥයන්ගේ ස්වරූපය බව වටහා ගත හැකි අවස්ථා ඉතිහාසය දෙස බැලීමෙන් මෙන්ම පවතින තත්වය දෙස බැලීමෙන් වූවද අපට මැනවින් වටහා ගත හැකිය. දිව දෙකේ සතත්වයින්ට හොදම උදාහරණය වන්නේ දේශපාලඥයින් යයි කීමට සිදුවන්නේ නම් එයද සාධාරණ පිළිතුරක් වනු ඇත.
ඕනෑම ජනතා පීඩක පාලකයෙකු එළවා දැමීමට හැකි බව මහින්ද රාජපක්ෂ නම් ඒකාධිපති පාලකයා එළවා දැමීමෙන් ලාංකික ජනතාව ඔප්පුකර පෙන්නුවේය.නමුත් ජනතා විශ්වාසය මේ වන විට පලුදු වෙමින් පවතින්නේ එළවා දැමූ පාලකයා ගෙන්වා ගැනීමට ජනතාව විශ්වාසය තැබූ පුද්ගලයා කටයුතු කිරීම නිසාය.
කුමන තත්වයක් යටතේ වූවද ජනතාව විශ්වාසයෙන් යුත්තව රටභාරදුන් ජනතා නායකයාට සිය පොරොන්දුවෙන් සහ ප්‍රතිඥාවෙන් මිදිය හැකිද?එබදු තත්වයකදී ඔහු වෙනදාටත් වඩා සෘජුව සහ කල්පාකාරීව කටයුතු කළ යුතු නොවන්නේද? සියල්ලන්ටම ප්‍රථම දේශපාලන සදාචාරය පිළිබදව පිළිබිඹුව විය යුත්තේ ඔහුය.
මෙහිදී වත්මන් ජනපතිතුමා වරක් සිදු කළ ප්‍රකාශයක් සිහිපත්වේ එනම් අගමැතිතුමා සහ තමන් ජේ.ආර්ගේ ගැටය හොදි ඇගේ හලා ගන්නේ නැතිව ලිහා ගත් බවට එතුමා සිදුකළ ප්‍රකාශයයි.දැන් කැබිනට් ප්‍රකාශක රාජිත සේනාරත්න මහතා පවසන පරිදි ජනාධිපතිතුමා උගුලකට අසුවී ඇත.ජේ.ආර්ගේ ගැටය ලෙහා ගත් ජනාධිපතිතුමා මෙබදු ගැටයක් ලිහා ගත නොහැකිව උගුලකට අසුවී නම් ජනවරම පාවා දුන්නේ නම් නායකත්වය පිළිබදව මතුවන්නේද ප්‍රශ්නයක්මය.
මන්ද නායකයා යනු ගැටලු විසදීමේ ශක්කියෙන් යුක්ත පුද්ගලයෙකු මිස ඒ මතට යටවී හොදි හලා ගන්නෙකු නොවිය යුතුය. වනයේ හැසිරෙන සතත්වයා පවා කල් ගත වන විට උගුල් ඇති තැන් හදුනා ගෙන උගුල්වලට හසු නොවී සිටීමේ හැකියාව ලබයි. දේශපාලනයේ පරිනථභාවය තුළින් දේශපාලකයෙකුද ලබන ප්‍රගුණතාවයක් හා දක්ෂතාවක් වන්නේ උගුල්වලට හසුනොවී,උගුල් බිද දමමින් උගුල් අටවන්නන් පිළිබද අවබෝධයෙන් කටයුතු කිරීමයි.අනෙක් අතට ජනවරම ලබා රටේම නායකයාවූවෙකුට එම හැකියාව ඇතිවාක් මෙන්ම ඒ සදහා වන වටපිටාවද සකසාගත හැකි බව අප විශ්වාස කරමු.කෙසේවූවත් ජනාධිපතිවරයා ඇගේ හොදි හලා ගනීවියැයි ජනතාව කිසිවිටක නොසිතු බව නම් කිව යුතුමය.
ලක්මාලි පන්නල
