ඒ අතර යාපනය ජනාධිපති මන්දිරයේ ඉදිකෙරුණු පිහිනුම් තටාක දෙකක් සඳහා බිලියන 2.5 ක මුදලක් වැය වීම, චීන සමාගමකින් ලබාගත් බිලියන 1.8ක කොමිස් මුදල, නොරොච්චෝලේ ගල් අඟුරු බලාගාරයෙන් ලබාගත් බිලියන 15ක කොමිස් මුදල, අධිවේග මාර්ග ඉදිකිරීමේදී ලබාගත් බිලියන 1.8ක මුදලක්, සමෘධි අරමුදලෙන් ලබාගත් බිලියන 6.5ක මුදල, මිත්‍රයෙකු හරහා ලංකාපුත්‍ර බැංකුවට ලබාදුන් බිලියන 16ක මුදල සම්බන්ධ පරීක්ෂණ කටයුතු තවමත් පැවැත්වෙන බව ඇමතිවරයා අනාවරණය කර තිබේ.
මහින්ද රාජපක්ෂ යුගයේ සිදු වූ වංචා හා දූෂණ සම්බන්ධ පැමිණිලි විභාග කිරීම නියමිත පරිදි සිදු කරන බවත් පරීක්ෂණ කටයුතු නවතා දැමීමට කිසි ලෙසකින්වත් කටයුතු නොකරන බවත් ඔහු අවධාරණය කරයි.
තම රජයට මහින්ද රාජපක්ෂ රජය හිටපු ශ්‍රේෂ්ඨාධිකරණ විනිසුරු ශිරාණි බණ්ඩාරනායකට සහ ෆීල්ඩ් මාෂල් සරත් ෆොන්සේකාට විරුද්ධව කටයුතු කළ ආකාරයට කටයුතු කල නොහැකි බව ඔහු පේනවා දෙයි. එම දිනවල පැවතියේ කැළෑ නීතිය බව එම පාලිත රංගේබණ්ඩාර මහතා පවසයි. පසුගිය කාලය තුල සිදු වූ වංචා සහ දුෂණ පිළිබඳ සොයා බැලීමේදී මහින්ද ඇතුළු පවුලේ උදවිය සම්බන්ධව තොරතුරු රැසක් හෙළිවන බව ඒ මහතා පෙන්වා දෙයි.
කොටස් වෙළඳපොල හරහා සිදු වූ මහාපරිමාණ අවිධිමත් ගනුදෙනු, ව්‍යාජ හැදුනුම්පත් යොදාගෙන පවත්වාගෙන ගිය බැංකු ගිණුම්, රාජ්‍ය දේපල අවභාවිතය, රජයේ ඉඩම් පැහැරගැනීම් මේ අතරට අයත්වන බව පැවසේ. මීට අමතරව කොළඹ ආශ්‍රිතව පැවති ඉතා වටිනා දේපළ තම හිතමිත්‍රාදීන් අතර බෙදාදීමේදී සිදු වූ වංචනික ගනුදෙනු සහ රජයේ ව්‍යපාර ආයතන හිත මිත්‍රාදීන්ට පැවරීම පිළිබඳ පරික්ෂණ කටයුතු මේවනවිට සිදු කරමින් පවතින බව පාලිත රංගේබණ්ඩාර මහතා පවසයි.
මහින්ද රාජපක්ෂ දැන් සුචරිතවාදී ස්වරුපයක් රඟ දැක්වීමට උත්සහ ගනිමින් සිටින්නේ එම වංචා දුෂණ රටේ සියලු දෙනාගෙන් සැඟවීමේ අරමුණෙන් බව ඇමතිවරයාගේ අදහසයි. මහින්ද දැන් උත්සහ ගනිමින් සිටින්නේ පාර්ලිමේන්තුවේ ඉහලම ධුරය ලබාගෙන ඔහුට සහ ඔහුගේ පවුලේ උදවියට එරෙහිව සිදුවන පරීක්ෂණ කටයුතු නැවත්වීමට උත්සහ ගැනීම බව රංගේ බණ්ඩාර ඇමතිවරයා පවසයි.
නමුත් මහින්ද රාජපක්ෂට මාධ්‍ය ප්‍රකාශ හෝ ප්‍රසිධියේ කතා පවත්වා මහා පරිමාණ වංචා සම්බන්ධව වගකීම වලින් ගැලවිය නොහැකි බව පවසන ඇමතිවරයා මහින්ද තමන්ට සහ තම සහචරයන්ට එරෙහිව එල්ල වී ඇති චෝදනාවල බරපතල බව දන්නා හෙයින් මේ ආකාරයට වියරුවෙන් හැසිරෙන බව පෙන්වා දී තිබේ.
