පසුගිය සති අන්තයේ පුද්ගල පැහැරගැනීම් පහරදීම් සහ දේපළ අලාභ හානි කිරීම් ගණනාවක් පිළිබඳ තොරතුරු වාර්තා වී තිබේ. මේ අතුරින් බරපතල සිදුවීම් මාතලේ සහ බදුරලිය ආදී ප්‍රදේශවලින් වාර්තා වී ඇත.
එක්සත් ජාතික පක්ෂයේ මාතලේ රත්තොට ආසන සංවිධායිකා රෝහිණි කවිරත්න මහත්මියගේ නිවසේ පිහිටුවා ඇති මැතිවරණ කාර්යාලයේ සේවයේ නියුතු පියල් දසනායක මහතා පැහැරගෙන ගොස් පහරදී තිබේ. ඊයේ(26) පස්වරුවේ දසනායක මහතා මාතලේ දිස්ත්‍රික් ලේකම් කාර්යාලයෙන් එළියට පැමි‍ණෙමින් සිටි‍යදී වාහනයකින් පැමිණි පිරිසක් ඔහු පැහැරගෙන ගොස් පහරදී තර්ජනය කර ඇත.
හිටපු නි. අමාත්‍ය ලක්ෂ්මන් වසන්ත පෙරේරා මහතාගේ අධාරකරුවන් පිරිසක් තමා පැහැරගෙන ගිය බවත් මැර පිරිස තමන් ලක්ෂමන් වසන්ත පෙරේරාගේ නිවසට රැගෙන ගිය බවත් පියල් දසනායක මහතා මාතලේ පොලිසියට පැමිණිලි කර ඇත. දසනායක මහතා මේවන විට මාතලේ රෝහලේ ප්‍රතිකාර ලබයි.
එජාප කළුතර දිස්ත්‍රික් අපේක්ෂක ජාතික හෙළ උරුමයේ මාධ්‍ය ප්‍රකාශක නිශාන්ත වර්ණසිංහ මහතාගේ බදුරලියේ පිහිටා ඇති පක්ෂ කාර්යාලයට ගිණි අවි සහිතව පැමිණි කණ්ඩාමක් ජුලි 26 වනදා අළුයම මෙම පහරදීම සිදුකර තිබේ. මෙවර මහ මැතිවරණයේ ගිණි භාවිත කිරීමේ පළමු සිදුවීම මෙයයි.
මේ අතර නාවලපිටිය ගම්පල පාරේ අංක 211/7 දරණ ස්ථානයේ පිහිටි එජාප අපේක්ෂක ආනන්ද අළුත්ගමගේ මහතා‍ට අයත් කාර්යාලයක් ද ජුලි 25 වන දින කිසියම් පිරිසක් විසින් කඩා බිඳ දමා ඇත.
