මේ එම සිදුවීමට සුජීව සේනසිංහ නියෝජ්‍ය අමාත්‍යවරයා දක්වා තිබූ ප්‍රතිචාරයයි. කෙසේ වෙතත් පසුගිය දින කිහිපය තුළ රූපවාහිනී දේශපාලනික සාකච්ඡා වැඩසටහන් වලදී ද ඒ මහතා ඉතා ආවේගශීලී ලෙස හැසිරෙනු දක්නට ලැබිණි.
ප්‍රතිචාරය උපුටා ගැනීම - ලංකාදීප
හබරකඩ හන්දියේදී බ්‍රහස්පතින්දා (30) තමන් පැවැත්වූ රැස්වීම නීති විරෝධී එකක් නොවන බවත් තමන් කිසිදු පොලිස් නිලධාරියකුට බැන නොවැදුණු බවත් අධිකරණ නියෝජ්‍ය ඇමැති සුජීව සේනසිංහ මහතා කියයි.
ලොරියක බෆල් යොදාගෙන පැවැත්වූ රැස්වීමකට නීති විරෝධී යැයි කියමින් පැමිණි පොලිස් සැරයන්වරයකු රැස්වීම කඩාකප්පල් කිරීමට උත්සාහ කළ බවත් නියෝජ්‍ය ඇමැති සුජීව සේනසිංහ මහතා ලංකාදීපයට ප්‍රකාශ කළේය.
තමන් මේ ගැන ජ්‍යෙෂ්ඨ පොලිස් අධිකාරී මහේන් ගුණසේකර මහතාට පවසා ඔහුගේ අවසරය මත රැස්වීම කරගෙන ගිය බවත් ඒ අතර අදාළ සැරයන්වරයා පොලිසියට ගොස් තමන් බැන වැදුණු බවට පැමිණිලි කර ඇතැයිද සේනසිංහ මහතා සඳහන් කරයි.
