රවි කරුණානායක මහතාගේ ගෙන් ගෙට යාමේ ප්‍රචාරක රැලියේදී වෙඩි ප්‍රහාරයට ලක් වී තුවාල ලැබූ පිරිස බැලීමට ජාතික රෝහලට පැමිණි අවස්ථාවේ මාධ්‍ය වෙත අදහස් දක්වමින් ඇමැතිවරයා එම අදහස් පළ කළේය.
මෙම ත්‍රස්තවාදීන් නීතිය ඉදිරියට ගේන්න පොරොන්දු වෙන බවත් තමා මරා දැම්මත්, ජනතාව මරා දැමීමට කිසිසේත් ඉඩ නොතබන බව පැවසූ ඇමැතිවරයා ප්‍රජාතන්ත්‍රවාදය ආරක්ෂා කිරීමට එක්වන ලෙස ජනතාවගෙන් ඉල්ලා සිටියේය.
ජනාධිපතිවරයා, පොලිස්පතිවරයා ඇතුළු සියලු දෙනාට සිද්ධිය සම්බන්ධයෙන් කරුණු ඉදිරිපත් කළ බවත් සැකකරුවන් නීතිය ඉදිරියට රැගෙන එන බවත්, ඊට රටේ මහජනතාවගේ සහ මාධ්‍යයේ සහාය බලාපොරොත්තු වන බවත් ඇමැතිවරයා පැවැසීය.
මුදල් ඇමැති රවි කරුණානායක මහතා මෙසේද පැවැසීය.
අද විපක්ෂයේ සැබෑ ස්වරූපය හෙළිවුණා. ඔවුන් ත්‍රස්තවාදී ක්‍රියාවලින් අපිව යටපත් කරන්න හදනවා. අද විපක්ෂය වල්මත් වෙලා. අපි සාමාන්‍ය පරිදි ඡන්ද නීති රකිමින් විනයානුකූලව ගෙයින් ගෙට යන අවස්ථාවේදී විපක්ෂය කළ මේ ක්‍රියාවෙන් පේනවා ඔවුන්ගේ ත්‍රස්තවාදී ක්‍රියා මොනවගේද කියලා.
මම ජනතාවට කියන්නේ මේ ත්‍රස්තවාදයට බයවෙන්න එපා. මේ වගේ තුප්පහි දේශපාලනය කරන්න ඉඩ තියන්න එපා. මේ අහිංසක ජනතාව පීඩනයට පත් කරන ත්‍රස්තවාදීන් මා නීතිය ඉදිරියට ගේන්න පොරොන්දු වෙනවා.
මම ජනතාවගෙන් ඉල්ලන්නේ මේ දේ ඇසින් දුටුවානම් සාක්කි දෙන්න ඉදිරියට එන්න.
අපිව ඉලක්ක කළාට කමක් නෑ. නමුත් රට ඉලක්ක කරන්න ඉඩ තියන්නේ නෑ. යනුවෙන් පැවසුවේය.
