රාජ්‍ය දේපළ තම පවුලේ බූදලය මෙන් භාවිතා කිරීම මැතිවරණ නොතිබූ අවස්ථාවල පවා රාජපක්ෂ පවුලේ සිරිත විය. වරෙක හිටපු ජනාධිපති ආර්යාව රත්මලානේ සිට මහරගම දක්වා තරම් වූ කෙටි දුරක් වෙනුවෙන්ද හෙලිකොප්ටර් භාවිතා කර තිබූ බව හෙළිවිය. එමෙන්ම ඊයේ දිනයේ පුවතකින් වාර්තා වූයේ ශ්‍රී ලංකන් ගුවන් සමාගමටද රාජපක්ෂ ජනාධිපතිවරයා වෙතින් රුපියල් මිලියන 114ක් අයවීමට ඇති බවයි. ජනපති පුතුන්ගේ රූපවාහිනී නාලිකාව විසින් ජාතික රූපවාහිනියේ සංරක්ෂිත දර්ශන පට රැගෙන යාමක් පිළිබඳව ද අසන්නට ලැබිණි. ඒ ඔවුන්ගේ හැටිය.
මැතිවරණ සමයේ බලයේ සිටිනා වූ පාර්ශ්වය මුදල් නොගෙවා බස්රථ ලබාගන්නේ ම යළි ජයග්‍රහණය ලදහොත් ඒ කිසිසේත් ම ගෙවීමක් අවශ්‍ය නොවනා නිසාය. මන්දයත් ජයග්‍රාහී පාර්ශ්වය කිසිවකු විසින් කලකට ප්‍රශ්න නොකෙරෙනා අතර ප්‍රශ්න කෙරුණද බලය විසින් ඒ සියල්ල විසඳන නිසාය. ලංකා ගමනාගමන මණ්ඩලය පසුගිය කාලය වන විට ජනතා බදුමුදල් ගිලිනා බහිරවයකුගේ තත්වයට වැටී පාඩු ලබමින් තිබුණි. සේවකයින් සඳහා මාසික වැටුප් ගෙවීමට හෝ ප්‍රමාණවත් මුදල් නොතිබුණු ලංගමයෙන් මුදල් නොගෙවා බස්රථ ලබාගැනීම යනු අනෙත් අතින් බදු ගෙවනා ජනතාවගේ ම වියදමින් ඔවුන්ට ම පෙනෙන සේ ප්‍රචාරක කටයුතු කිරීමකි.
කෙසේ වෙතත් රාජපක්ෂ මහතා ජනාධිපතිවරණය පරාජය වීමෙන් අනතුරුව මෙකී බස්රථ වෙනුවෙන් මුදල් නොගෙවීම පිළිබඳව සමාජය තුළ ඇතිවූ කතා බහ නිසා ම ඉන් පසුව වත්මන් රජයේ මැති ඇමතිවරුන් බස් රථ ලබාගන්නා අවස්ථාවන්හිදී ඒවා සඳහා ගෙවීම් කළ බිල්පත් පවා ප්‍රසිද්ධ කෙරෙනා ප්‍රවණතාවක්ද ඇති විය. බොහෝවිට ඒ ප්‍රවණතාවයද තාවකාලික විය හැකි බැවින් අනාගතයේ රාජ්‍ය දේපළ පරිහරණය කරනා සියල්ලන්ට ම පාඩමක් වනු පිණිස මෙකී පුද්ගලයින්ට නඩු පවරා මෙම මුදල අය කරගත යුතුව ඇත.
මීට පෙර මේ පිලීබඳව විමසීමේ දී සන්ධානය ප්‍රකාශ කළේ බස් රථ කවුරුන් විසින් ලබා ගත්තේදැයි තමන් නොදන්නා බවය. මෙවන් බයිලා මාධ්‍යයට මිස අධිකරණයට පැවසිය නොහැකි බැවින් කළයුතු හොඳම දේ ඔවුන් අධිකරණය ඉදිරියට කැඳවීමය. බස් රථ රැගෙන බිල්පත් ජනතාවට පෙන්වීමේ සංස්කෘතිය වෙනුවට කිසිවෙකුත් මුදල් නොගෙවා බස් රථ හෝ වෙනත් රාජ්‍ය දේපළක් භාවිතා නොකිරීමේ සංස්කෘතියකට රට හුරුවිය යුතුය.
