බොදු ජන පෙරමුණේ සැබෑ ම අරමුණ මෙය නම් ඔවුන් මුලින් ම කළ යුතුව ඇත්තේ ගලගොඩ අත්තේ ඥානසාර නම් චීවරධාරියාව අදාල සංවිධානයෙන් ඉවත් කිරීමය. 'මතට තිත' වැනි කතා අදාලම නොවන ඔහු බීමතින් රිය පදවා පොලිස් නිලධාරීන්ට බැණවැදී උසාවියෙන් දඬුවම් ද ලැබූ අයෙකි. 'යහපාලනයක්' තබා සංඝ සමාජය තුළ රැකිය යුතු මූලික විනය හෝ රැකීමට අසමත් අයෙක් - අවම වශයෙන් එය රහසින් කිරීමට හෝ අසමත් - මූලික පුද්ගලයෙකු ලෙස තබාගත් කළ අදාල සංවිධානයේ අනිත් පුද්ගලයින්ට සිදුවන්නේ එක්කෝ ගල්පැලෙන බොරු සමාජය ඉදිරියේ දෙසා බෑමට හෝ නැතිනම් කටේ පිට්ටු හිරවූ ලෙසට ඔහේ ඉඳීමට ය.

අළුත්ගම ගිනි අවුළා මිනිස් ජීවිත තුනක් සහ කෝටි ගණනක දේපළ විනාශයක්ද, ජාතීන් අතර සංහිඳියාවට ඉතාම දරුණු තුවාලයක්ද, ජාත්‍යන්තරව ලංකාවට ම කළු පැල්ලමක් ද එක් කළා වූ එකී චීවර ධාරියා සමඟ 'අපිරිසිදු පුද්ගලයින්ගෙන් තොර පාර්ලිමේන්තුවක්' හැදීමට කතා වීම හිනා වී ඇඬෙන විහිළුවකි.

අනෙක් අතින් බොදු නාමය මුල් කරගෙන පක්ෂය පිහිටුවා විෂඝෝර සර්පයෙකු ලකුණ ලෙස තෝරාගනිමින් ම බො.ජ.පෙ පෙන්වා ඇත්තේ සුභ ලකුණක් නොවේ. නාගයා යනු ශ්‍රී ලංකාවේ සිටින මාරාන්තික විෂ සහිත සර්පයින් සර්පයින් 6 දෙනාගෙන් එකෙකි. බො. බ. සේ. ලෙස මෙතෙක් කාලයක් එම සංවිධානය කළේද ජාතිවාදය නම් මාරාන්තික විෂ සමාජ දේහය පුරා පැතිරවීමය. අනෙක් අතට නාගයා යනු කන් නොමැති උරගයෙකි. ඌ සංවේදී වන්නේ තරංගයන්ට පමණය. බො.බ.සේ. ද මෙතෙක් තමන්ට ආ චෝදනා වලට සිටියේ නෑසූ කන්වය. ඔවුන් ඉහළින් ආ තරංගයන්ට අනුව නැටවුණා පමණි. එය අහිකුණ්ටකයාගේ නයි නළාව දැක වටේට රැස්වූවන්ට පෙනේ පුප්පන නයෙක්ගේ ක්‍රියාවක් වැනිය.

නන්ද හිමි ඇතුළු පිරිසට රට වෙනුවෙන් යමක් කිරීමේ ම වුවමනාවක් තිබේ නම් කළ හැකි හොඳම තම තමන්ගේ විහාරස්ථානවලට වී ගමේ දායකයින්ගේ වැඩක් බලාගෙන හිඳීමය. 2025 හෝ පාර්ලිමේන්තුව පිරිසිදු කරගැනීම අනෙක් පක්ෂ වලින් කෙරුණත් නොකෙරුණත් සියල්ලට පෙර ශාසනය පිරිසිදු කරගනිමින් පාරාජිකා භික්ෂූන්ට එරෙහිව යමක් කිරීමට පෙළඹුනා නම් වටින්නේ ය.