අසත්‍ය, ද්වේශසහගත, අපහාසාත්මක ප‍්‍රවෘත්තිය නිසා සිදුවී ඇති කීර්ති නාමයට හානිවීම වෙනුවෙන්, එක්සත් ජාතික පෙරමුණු අපේක්ෂක පාඨලී චම්පික රණවක මහතාට රු. මිලියන 500 ක වන්දි මුදලක් ගෙවන ලෙස, නීතිඥ එම්.ඞී.ජේ. බණ්ඩාර මහතා විසින්, සීමාසහිත සිලෝන් නිවුස් පේපර්ස් පුද්ගලික සමාගමට සහ දිනපතා මව්බිම පුවත්පතේ ප්රධාන කර්තෘවරයාට එරෙහිව ඊයේ (8) එන්තරවාසියක් නිකුත් කර ඇත.
පාඨලී චම්පික රණවක මහතා පුරවැසි යුතුකමක් ලෙස සලකා මහජනතාව විසින් ලබාදෙන තොරතුරු වලට අනුව සීමාසහිත සිලෝන් නිව්ස්පේපර්ස් පුද්ගලික ආයතනයට සම්බන්ධ ටිරාන් අලස් යන අයට විරුද්ධව රාඩා ආයතනයේ දූෂිත ගනුදෙණු පිළිබඳව පරීක්ෂණයක් පවත්වන ලෙසට පොලිස් දෙපාර්තමේන්තුවට පැමිණිල්ලක් කර ඇති අතර, ඒ සඳහා පළිගැනීමක් ලෙස පාඨලී චම්පික රණවක මහතාට විරුද්ධව නිරන්තරව ද්වේශසහගත, අසත්‍ය ප‍්‍රවෘත්ති කිහිපයක්ම මව්බිම දිනපතා පුවත්පතේ ප්රධාන කර්තෘවරයා මීට පෙරද පළකර තිබේ.
පාඨලී චම්පික රණවක මහතාගේ මැතිවරණ කටයුතු වලට හානියක් මෙන්ම, හිටපු කැබිනට් අමාත්‍යවරයෙකු සහ පාර්ලිමේන්තු මන්ත‍්‍රීධූරවල රාජකාරි කටයුතු වලට අවමන් සහගත ප‍්‍රවෘත්තියක් වන, පදනම් විරහිත ඉහත කී අසත්‍ය ප‍්‍රවෘත්තියට වෙන්වෙන්ව සහ සාමූහික වන්දි වශයෙන් අගෝස්තු මස 25 වන දිනට හෝ ඊට ප‍්‍රථමයෙන් රු. මිලියන 500 ක මුදලක් ගෙවන ලෙසත්, එදිනට ප‍්‍රථම එම මුදල ගෙවීමට අපොහොසත් වුවහොත්, එම මුදලට එකතුවන නෛතික පොලිය සමග නඩු ගාස්තුද, අදාළ පුවත්පතේ ප්රධාන කර්තෘවරයා සහ සමාගම විසින් ගෙවිය යුතු වේ.
