එමෙන් ම පසුගිය කාල සීමාව තුළ අලි ජාවාරම් පිළිබඳව විශාල තොරතුරු ප්‍රමාණයක් සමාජගත වූ අතර එජාපය එවකට මෙය නතර කරවීම සඳහා පියවර ගන්නා බවද පවසා සිටියේය. අලි ඇතුන් දැනට ගෘහාශ්‍රිතව පරිහරණය කරන්නේ ඉතාම සීමිත පිරිසකි. ඒද බොහෝවිට තම මහන්තත්වය පෙන්වීම සඳහා මිස වෙනත් වුවමනාවකින් නොවේ.
කාන්තා අයිතීන් පිළිබඳ කතා කරන රෝසි සේනානායක මහත්මිය සතුන්ගේ අයිතීන් නසමින් තමන්ගේ මනාප ගොඩ වැඩි කර ගැනීමට සතුන් යොදා ගැනීම ඉතාමන් කණගාටුදායක සිද්ධියක් ලෙස පරිසර හා ස්වබාදහම් අධ්‍යයන මධ්‍යස්ථානය පෙන්වා දෙයි.
මැතිවරණ ප්‍රචාරණයකදී විය යුත්තේ ඇස ඇදගැනීම නම් අලියා වෙනුවට රෝසි මහත්මියට තනිවම එම කාර්යය පහසුවෙන් කරගත හැකිය. ඒ ඇය ලංකාව තුළ ආකර්ශනයක් දිනූ කාන්තාවක් හෙයිනි. නමුත් මැතිවරණය අරභයා ජනතාවට දිය යුත්තේ තමන්ගේ රට පිළිබඳ අනාගත දැක්ම සහ වැඩපිළිවෙලය. ඔවුන්ගේ ඡන්දය ගත යුත්තේ එය පිළිබඳව දැනුවත් කරගෙනය. නමුත් දැක්මක් හෝ වැඩපිළිවෙලක් අහිමි අයට නම් වනු ඇත්තේ හුදෙක් ඇස් ඇදගන්නා හෝ අල්ලස් දෙන යමක් කිරීම පමණි. රෝසි මහත්මිය, ඔබ එතරම් බංකොළොත්ද ?
