මහින්ද රාජපක්ෂ මහතා කෙරෙහි මෛත්‍රීපාල සිරිසේන මහතාට පෞද්ගලිකව හා දේශපාලන වශයෙන් සතුරු කමක් තිබුණද සන්ධානය ජයග්‍රහණයට බාධා වීම සිදුවන ආකාරයේ කටයුතු කිරීම එක්සත් ජාතික පක්ෂයේ ජයග්‍රහණයට හේතුවන බව ජනාධිපතිවරයාගේ දේශපාලන උපදේශකයන්ට නොතේරෙන බව ශ්‍රි ලනීප පාක්ෂිකයන් පවසති.
ජනාධිපතිවරයාගේ දේශපාලන උපදේශකයන් ලෙස කටයුතු කරන්නේ ශිරාල් ලක්තිලක, අශෝක අභයගුණවර්ධන, මලිත් ජයතිලක යන පිරිස බවද දැන ගැනීමට තිබේ. ඊයෙ නිකුත් කරනු ලැබු ලිපියද ඔවුන් විසින් සකසනු ලැබූවක් බව ජනාධිපති කාර්යාල ආරංචි මාර්ග පවසයි. එය ජනාධිපතිවරයාගේ පූර්ණ අවබෝධය මත නිකුත් කෙරුණාද යන්න නිශ්චිත නැත්තත් මෙය මාධ්‍ය වෙත ලබා දීම සඳහා පෙරමුණ ගෙන තිබෙන්නේ ජනාධිපති මාධ්‍ය අංශයේ සිටින කිලී මහරාජාගේ ගෝලයකු විසින් බවද හෙලිවේ. එයද නිල වශයෙන් නොව ජංගම දුරකතන කැමරාවකින් ලබා ගන්නා ලද ඡායාරූප ලෙසය. රාජ්‍ය මාධයට හෝ මෙහි නිල පිටපත් ලබා දි තිබුනේ නැත.
කෙසේ නමුත් මෙම ලිපිය මේ මොහොතේ නිකුත් කරන බව ජනාධිපතිවරයාට පක්ෂපාත සන්ධාන නායකයන් හෝ දැන සිටියේ නැත. මේ නිසා එය ඔවුන්ගේ ඡන්ද ව්‍යාපාරයන් කෙරෙහිද දැඩිව බලපාන්නට ගෙන තිබේ. ඊයේ රාත්‍රියේදීම ජනාධිපතිවරයා අමතා ඇති ශ්‍රි ලනිප ජේෂ්ඨයන් ජනාධිපතිවරයාට සිය විරෝධය පලකර ඇති බවද වාර්තාවේ.
විශෙෂයෙන්ම ඔහු විසින් අගමැතිධුරයට නම් කරන ලද ජේෂ්ඨයන් විසින්ම ඔහුව විවේචනය කිරීම නිසා ජනාධිපතිවරයා දැඩි අපහසුවකට පතව තිබේ.
මෛත්‍රීපාල සිරිසේන මහතා සමඟ දේශපලන ගනුදෙනුවක සිටි සුසිල් ප්‍රේමජයන්ත මහතා ඊයේ මධ්‍ය වැඩ සටහනකදී ජනාධිපතිවරයාගේ මෙම ක්‍රියා මාර්ගය දැඩිව විවේචනය කළ අතර අගමැතිවරයා ලෙස මහින්ද රාජපක්ෂව නියත ලෙසම පත් කරවන බවට සහතික කළේය.
