මේ වාර්තාව රටවල් රැසක්ම ඉවසිල්ලෙන් බලා සිටින බව පෙරේදා (14) මෙම සැසිය අමතමින් කථා කළ අමෙරිකාවේ ජාත්‍යන්තර සංවිධාන භාර නියෝජ්‍ය තානාපති එරික් එම්. පාකිලේ ප්‍රකාශ කෙළේය. එම විමර්ශන වාර්තාවේ දක්වා ඇති නිර්දේශ ක්‍රියාත්මක කිරීම සඳහාත් විශ්වාසය තහවුරු කිරීම පහසුවීම උදෙසාත් ශ්‍රී ලංකා රජයට සහය දක්වන ආකාරයෙන් යෝජනාවක් ගෙනඒමට අදහස් කරන බවත් හෙතෙම සඳහන් කළේය. මේ අතර යුරෝපා සංගමය ප්‍රකාශ කළේ ශ්‍රී ලංකාවට එරෙහි වාර්තාව අපේක්ෂා කරමින් සිටින අතරම මානව හිමිකම් සුරක්ෂිත කිරීම සඳහාත් රටතුළ සුහදත්වය සහතික කිරීම උදෙසාත් ශ්‍රී ලංකාවට උපරිම සහය ලබාදෙන බවය.
එමෙන්ම එක්සත් ජාතීන්ගේ මානව හිමිකම් කොමසාරිස් ඉදිරිපත් කරන නිර්දේශ ඉදිරිපත් කිරීම සඳහාත් ශ්‍රී ලංකා රජයට පූර්ණ සහය ලබාදීමට තම රජය කටයුතු කරන්නේ යැයි බ්‍රිතාන්‍ය ප්‍රකාශ කර තිබේ.
මේ අතර දෙමළ ජාතික සන්ධානය නියෝජනය කරමින් ජිනීවා ගොස් සිටින පාර්ලිමේන්තු මන්ත්‍රී එම්.ඒ. සුමන්දිරන් ජිනීවාහිදී බ්‍රිතාන්‍ය විදේශ කටයුතු සහ පොදු රාජ්‍ය මණ්ඩලීය රාජ්‍ය අමාත්‍ය හිකෝ ස්වයර් හමුවී සාකච්ඡා කර තිබේ.
එහිදී සුමන්දිරන් ප්‍රකාශ කර ඇත්තේ ශ්‍රී ලංකාවේ වගවී‍මේ ක්‍රියාදාමයේදී ජාත්‍යන්තරයේ අධීක්ෂණය තිබිය යුතු බවය.
dinamina
