මේ සමාගම හරහා විවිධාකාර වූ ගැටලු සහගත තත්ත්වයන් මෑතක සිට විවිධ අවස්ථාවල පැන නඟින අතර එය තවදුරටත් පවත්වාගෙන යාමෙන් මේ රටට ඇතිවෙන ප්‍රයෝජනය හෝ හානිය පිළිබඳ මේ වන විටත් අවධානය යොමු වී තිබෙන බවද රුවන් විජයවර්ධන මහතා පවසයි.
පසුගියදා ගාල්ල වරායට නුදුරු මුහුදේදී නාවික හමුදාව මඟින් අත්අඩංගුවට ගත් 'ඇවන්ගාඩ්' නෞකාවේ තිබී හසු වූ අවි ආයුධ තොගයද රක්නා ලංකා ආරක්ෂක සමාගමට අයත් ඒවා බවට පරීක්ෂණවලදී තොරතුරු අනාවරණය වී තිබේ.
2006 වසරේදී රක්නා ආරක්ෂා ලංකා ආරක්ෂක සමාගම පිහිටුවා තිබේ. මෙය ආරක්ෂක අමාත්‍යාංශයට සම්බන්ධ කර පිහිටුවන ලද ආයතනයකි. මෙවැනි ආරක්ෂක ආයතනයක් පිහිටුවීමේ ප්‍රධාන අරමුණ ලෙස එවකට පැවැති රජය පෙන්වා දී ඇත්තේ මෙරටට නුදුරු මුහුදු සීමාව තුළින් ගමන් ගන්නා විවිධ රටවලට අයත් නෞකා මුහුදු කොල්ලකරුවන්ගෙන් ආරක්ෂා කිරීම සහ වෙනත් විවිධ හේතු මත නැව් වලට එල්ලවන තර්ජනවලින් බේරා ගැනීම සඳහා වෙයි. මේ සමාගම නැව් වලට ආරක්ෂාව සපයන නිලධාරීන් හාරදහසක් පමණ සම්බන්ධ කරගෙන ඇත. ඒ සඳහා එම සමාගම යටතේ අවි ආයුධ විශාල ප්‍රමාණයක්ද වෙයි.
සම්පූර්ණ පුහුණුව ලැබූ නාවික ආරක්ෂක ප්‍රධානීන් හත්සියයක් පමණද මෙම ආයතනය යටතේ සිටිති.
රක්නා ආරක්ෂා ලංකා ආරක්ෂක සමාගම පිහිටුවීම තුළින් ආරක්ෂක අමාත්‍යාංශය බලාපොරොත්තු වූ අරමුණ ඉෂ්ඨ වී තිබේද නැද්ද යන්න සම්බන්ධව මේ වන විටත් සාකච්ඡාවට භාජනය වී තිබේ.
එය මෙරටට අනවශ්‍ය එකක් බව පෙනී ගියහොත් එය පවත්වාගෙන යාම නැවැත්වීමටද ඉඩ ඇත.
dinamina
