පැල්පිට මහතා නුගේගොඩ ප්‍රදේශයේ ලක්ෂ 160ක අත්පිට මුදලට ඉඩමක් මිල දී ගෙන ඇති බවත් කොළඹ 7 ප්‍රදේශයේ සුවිසල් නිවාසයක් සාදමින් සිටින බවත් ලක්ෂ 90 කට නුගේගොඩ තවත් ඉඩමක් ඇතැයි මූල්‍ය බුද්ධි ඒකකයට තොරතුරු ලැබී ඇති බවට රහස් පොලිසිය අධිකරණයට කරුණු වාර්තා කර තිබිණ.මෙම දේපළ ඔහු විසින් ලබාගෙන ඇත්තේ විදුලි සංදේශ නියාමන කොමිසමට ලද මුදල් බවට එම කොමිසමේ සේවකයින්ගේ ප්‍රකාශ මත කරුණු තහවුරු කර ගනිමින් සිටින බවට රහස් පොලිසිය අධිකරණයට දැන්වීය.

පසුගිය මැතිවරණයට සමගාමීව මිලියන 600ක සිල් රෙදි බෙදා දීමේ ව්‍යාපෘතිය, නෙළුම් කුලුන, සූරිය වැව අයිට් පාර්ක් යන ව්‍යාපෘතීන් සඳහා විශාල වශයෙන් කොමිසමේ මුදල් අයථා ලෙස ලබාගෙන ඇති බවට රහස් පොලිසිය පැල්පිට මහතා වෙත චෝදනා නගා තිබිණ.තවද කිසිදු ටෙන්ඩර් පටිපාටියකින් ‍තොරව පරිගණක මිල දී ගැනීමක් සම්බන්ධයෙන් ද රහස් පොලිසිය වෙත පැමිණිල්ලක් ලැබී ඇති බව පවසන පොලිසිය මූල්‍ය බුද්ධි ඒකකයේ සහාය ලබාගෙන විමර්ශන ඉදිරියට පවත්වාගෙන යන බව පැවසීය.

2010/12/30 දින නීතිඥ හා ප්‍රසිද්ධ නොතාරිස් එස්.එස්.ආර්.වීරසිංහ යන අය ලියන ලද ඔප්පු අංක 67, දේවාල පාර, නුගේගොඩ ලක්ෂ 90 ඉඩම සම්බන්ධයෙන් ද ලක්ෂ 160 අත්පිට මුදලට ගැනුණු නුගේගොඩ අනෙක් ඉඩම සම්බන්ධයෙන් ද තැරැව්කරුවන්ගෙන් හා නීතිඥවරුන්ගේ ප්‍රකාශ ලබාගෙන ඇති බවට රහස් පොලිසිය අධිකරණයට කරුණු වාර්තා කර තිබිණ.

නො.283/බී, ශ්‍රී දේවානන්ද පාර, තුම්බෝවිල පිළියන්දල පදිංචි ගයාන් නිශාන්ත ශ්‍රී වසන්ත මහතා 2015/04/29 කරන ලද පැමිණිල්ලකට අනුව රහස් පොලිසිය මෙම සිද්ධියේ විමර්ශන ආරම්භ කර තිබේ.

විතානපැල්පිට කේරළාගේ අනූෂ පැල්පිට, බිරිඳ වන අනෝමා පැල්පිට හා පුතු පසන් අවිශ්ක පැල්පිට යන අයගේ බැංකු ගිණුම් විස්තර රහස් පොලිසිය වෙත ලබාදෙන ලෙස මොවුන් සම්බන්ධයෙන් 2006 මුදල් විශුද්ධිකරණ පත යටතේ විදුලි සංදේශ නියාමන කොමිසමේ ත්‍යාග මුදල් අයථා පරිහරණය හා නීති විරෝධි ලෙස මුදල් හා දේපළ උපයා ගැනීමට අදාළව විමර්ශන පවත්වන බවට රහස් පොලිසිය අධිකරණයට දැන්වීය.

අදාළ කරුණු සලකා බැලූ මහේස්ත්‍රාත්වරයා රහස් පොලිසියේ ඉල්ලීම පරිදි පැල්පිට මහතාගේ හා ඔහුගේ බිරිය පුතුගේ ගිණුම් විස්තර ලබා දෙන ලෙසට මුල්‍ය ආයතන 81 කළමනාකරුවන් නියෝග නිකුත් කළේය.

ඒ අනුව රාජ්‍ය හා වාණිජ බැංකු 34 ක හා මුල්‍ය ෆිනෑන්ස් සමාගම් 47ක කළමනාකරුවන් වෙත මෙසේ නියෝග නිකුත් කෙරිණ.

dinamina