මේවන විට රහස් පොලීසිය ලබාගෙන ඇති සීසීටීවී දර්ශනවල තිබිය හැක්කේ ඔහු ඝාතනය කළ ස්ථානයේ ඒවා නොව මෙම සිදුවීමට පෙර ඔහු රැඳි සිටි ස්ථානයේ හා මහා මාර්ගයේ වාහනයෙන් ගමන් කරමින් සිටියදී කැමරාවට අහුවූ දසුන් පමණක් බවට සැක කෙරේ. එම දර්ශන හෝ තවම පොලීසිය විසින් තවමත් පැහැදිලි කරගෙන නොමැත.
2012 වර්ෂයේදී සිදුවූ තාජුඩීන් මහතාගේ ඝාතනය සහ ඔහු පැහැරගෙන යැමේ සිදුවීම්වලට අදාළ සීසීටීවී වීඩියෝ පට මකා දමා ඇති බව පරීක්‍ෂණවලින් හෙළිවී ඇත. එම වීඩියෝපට කීපයක්‌ පරීක්‍ෂා කිරීම සඳහා මොරටුව විශ්වවිද්‍යාලය වෙත භාරදී ඇති බව පොලිස් ආරංචි මාර්ග පවසයි.
මෙම ඝාතනය සිදුවීමෙන් පසු එවකට පොලිසිය කිසිම ආකාරයක නිවැරදි පරීක්‍ෂණයක්‌ සිදු නොකිරීම නිසා මේ සම්බන්ධයෙන් පරීක්‍ෂණ පැවැත්වීමේදී ගැටලු රැසකට මුහුණ දීමට සිදුවී ඇතැයි පොලිසිය පවසයි.
මෙම ඝාතනය සිදුවීමෙන් වසර 3 කට පසු නව රජය බලයට පත්වී 2015 වර්ෂයේ මාර්තු මාසයේදී මෙම පරීක්‍ෂණ කටයුතු නැවත ආරම්භ කරනු ලැබීය.
කොළඹ නගරයේ ප්‍රසිද්ධ ස්‌ථානවල සවිකර ඇති සීසීටීවී කැමරා දර්ශන වසර තුනක කාලයක්‌ ගබඩා කර තබාගෙන නොසිටින අතර ඒවා කෙටි කාලසීමාවක්‌ තුළදී මකා දමන බවද පොලිස් මූලස්‌ථානය කියා සිටියි.
පොලිසිය මේ වන විට උත්සාහ කරමින් සිටින්නේ මෙම ඝාතනයට අදාළව රූපගතවී ඇති බවට සැකකරන සීසීටීවී දර්ශන නැවත ලබා ගැනීමටයි.
