රැස්වීමට කළ බාධා පිළිබඳ ඇමෙරිකානු තානාපති කාර්යාලයේ කනස්සල්ල පළ කරමින් නිකුත්කර ඇති එම නිවේදනය මගින් නීතියේ ආධිපත්‍යය සහතික කරනමෙන්  ශ්‍රී ලංකා රජයෙන් ඉල්ලා සිටියි.

එම නිවේදනයේ මෙසේද සඳහන්වේ. 

අගෝස්තු 4 වන දින, ඇමෙරිකානු තානාපති කාර්යාලයේ නිලධාරීන්ගේ සහභාගීත්වයෙන් පවත්වන ලද රැස්වීමක් කෝපාන්විත උද්ඝෝෂණකරුවන් පිරිසක් (භික්ෂූන්ද ඇතුළුව) විසින් අතරමගදී නවත්වන ලදී. 


කොළඹ කතෝලික පල්ලියක පවත්වන ලද මෙම රැස්වීමට මෙම කලහකාරී පිරිස බලහත්කාරයෙන් ඇතුළ් වූයේ සිවිල් යුද්ධය නිසා අතුරුදන් වූ පුද්ගලයින්ගේ පවුල්වල අය ඔවුන්ගේ තොරතුරු සිවිල් සමාජ කණ්ඩායම් හා තනාපති ප්‍රජාව සමග පවසමින් සිටිනා අවස්ථාවේදී ය. 


මෙහිදී පොලිස් නිලධාරීන්ගේ මුල් ප්‍රතික්‍රියාව තුළ රැස්වීමට බාධා කිරීමට කලහකාරීන්ගේ උත්සාහයට සහයෝගයක් දක්නට ලැබීම ඇමෙරිකානු තානාපති කාර්යාලයේ කනස්සල්ලට හේතු විය. එසේ වුවද තානාපති කාර්යාලයේ නිලධාරීන් සමග සාකච්ඡා කිරීමෙන් පසු පොලිසිය විසින් කාර්යක්ෂම ලෙස තත්ත්වය පාලනය කරන ලදී.


මෙම පිරිස් අතුරුදන් වූ අයගේ පවුල්වල අය වෙත වෛරීසහගත සටන් පාඨ පළකරමින්, පදනම් විරහිත චෝදනා ඉදිරිපත් කරමින් ඔවුනට තර්ජනය කළහ. 

මෙම උද්ඝෝෂණකරුවන් විසින් පළ කළේ සාමකාමී උද්ඝෝෂණයකට ඇති සිය අයිතිය නොව සාමකාමීව රැස්වී සිටි යුද ගැටුම්වලින් ඉතිරි වූ පිරිසකට (ළමයින්ද ඇතුළුව) බාධා කිරීමයි. 

මෙම ක්‍රියාවෙන් අවබෝධ වූයේ උද්ඝෝෂණකරුවන් විසින් එහි සිටි අය තැති ගන්වා ඔවුන් නිශ්ශබ්ද කිරීමයි.

ශ්‍රී ලංකා රජය වෙත අමෙරිකා එක්සත් ජනපදය විසින් බල කර සිටිනුයේ නීතියේ ආධිපත්‍යය බලගන්වා, ශ්‍රී ලංකාවේ සියලුම වැසියන්ට සිය භාෂණයේ හා රැස්වීමේ නිදහස ඇතුළුව මූලික මානව අයිතීන්වලට ඉඩ සලසා දෙන ලෙසය.

මෙම රැස්වීමට සහභාගිවීමට උතුරේ සිට මෙහි පැමිණි මෙම පවුල්වල අය කොළඹ දී හා සිය ගම් බලා ගිය පසු ඔවුන්ගේ ආරක්ෂාව තහවුරු කිරීමට කළ හැකි සියල්ල කරන මෙන් ද අපි ඉල්ලා සිටිමු.''