බෝධි භාරකාර මණ්ඩලය මෙම හොර ඔප්පුව ලියා ගැනීමෙන් නොනැවතී එය නීත්‍යනුකූල කර ගැනීමට ප‍්‍රසිද්ධියක් ලබා ගැනීමේ වුවමනාවෙන් පසුගිය ජනවාරි 08 වනදා උදෑසන ජනාධිපති මෛත‍්‍රීපාල සිරිසේන මහතා සහභාගී වන උත්සවයක් සංවිධානය කර එහි දී මෙම හොර ඔප්පුව ජනාධිපතිතුමා ලවා භාරකාර මණ්ඩලයට පරිත්‍යාග කරවා ගත්තේය. මුළු මනින්ම ගිහි භාරකරුවන් පිරිසක් යටතේ පාලනය වන කළුතර බෝධි භාරකාර මණ්ඩලය 1951 දී ඒකපාක්ෂිකව ඉපැරැණි ගංගාතිලක විහාරයේ දේපළ කොන්දේසි නවයකින් යුත් බදු ඔප්පුවකින් ලබා ගත්තත් එහි එකම කොන්දේසියක්වත් කිසිම දාක ඉටු කර නැතැයි එම විහාරයේ උරුමය හිමි කළුතර දිසාවේ අධිකරණ සංඝ නායක මාරපන විජිත හිමියෝ පැවසූහ.
මේ පැරැණි බදු ඔප්පු හා අධිකාර පත‍්‍රවලින් පෙන්නුම් කෙරෙන්නේ ඉංග‍්‍රීසි ආණ්ඩුවේ කළුතර ඒජන්තගේ නිල නිවස පිහිටා තිබුණු මේ පූජා භූමිය හා බෝධි භූමිය දීර්ඝ කාලයක් තිස්සේ කෙරුණු උද්ඝෝෂණ ව්‍යාපාරයකින් පසු 1937 දී යළි සඟ සතු කර ගැනීමට හැකි වූ බවයි. මෙම උද්ඝෝෂණ ව්‍යාපාරයට නායකත්වය දුන් හැඩිගල්ලේ විපුලසිරි හිමියන්ට 1949 දී අධිකාර පත‍්‍රයකින් මල්වතු විහාරයේ එවකට මහනායක ධුරය දැරූ රඹුක්වැල්ලේ ශ‍්‍රී ධර්මරක්ෂිත නාහිමි විසින් මෙම භූමිය පවරා දී ඇත.
නමුත් එකල ප්රධාන බස් රථ සමාගම් හිමියෙක් වූ සව්ත් වෙස්ටර්න් බස් සමාගම හිමි සර් සිරිල් සොයිසා මෙම භූමිය 1951 පැවති එජාප රජය උපකාරයෙන් ලියා ගත් බදු ඔප්පුවකින් කළුතර බෝධි භාරකාර මණ්ඩලයට බදු ගත්තත් එයට කිසිදු වෙනත් නීත්‍යනුකූල උරුමයක් තිබී නැත. දැනට හැඩිගල්ලේ විපුලසාර හිමියන්ගේ එකම පැවිදි ශිෂ්‍යයා වන කළුතර දකුණේ සිරි නිකේතනාරාමාධිපති මාරපන විජිත හිමියෝ මෙම හොර ඔප්පුවට විරුද්ධව සහ කළුතර බෝධි භාරකාර මණ්ඩලයට විරුද්ධව නීතිමය පියවර ගනිමින් සිටිති.
sathhanda.lk
