සේවා වනිතා ඒකක විසින් හෙට එනම් ජුලී 03 වන දින නෙලුම් පොකුණ රඟහලේ පැවැත්වීමට නියමිත " රණවිරු මියැසි හරසර" නමින් වන සංගීත සංදර්ශනයක සඳහා වන ප්‍රවේශපත්‍ර අලෙවි කිරීම හමුදා බල ඇණි වලට බාර දී තිබේ. අනිවාර්ය නියමයක් ලෙස නිශ්චිත ප්‍රවේශ පත් ප්‍රමාණයක් අලෙවි කළයුතු බවද එමෙන්ම සමරු කලාපය සඳහා වෙළඳ දැන්වීම් එකතුකර දිමද නියම කර තිබේ.

ඒ අනුව හමුදාවේ සෑම රෙජිමේන්තුවකින්ම රුපියල් 50,000 ක වෙළඳ දැන්වීම ලබා දිය යුතුය. එමෙන්ම සෑම බලෑණියක් විසින්ම රුපියල් ලක්ෂ 3 ක ප්‍රවේශපත්‍ර විකුණා දිය යුතුය. මේ මුදල් සොයා දීම අනිවාර්ය කර තිබෙන අතර ඒ සඳහා අපොහොසත් වන අණදෙන නිළධාරීන්ගෙ නම් සේවා වනිතා ඒකකය වෙත දන්වන ලෙසද සේනා විධායකයන් වෙත දැනුම් දී ද තිබේ. මේ අනුව හමුදාපති බිරින්දෑ ඉල්ලා සිටින මුදල් තමන්ගේ වැ‍ටුපෙන් හෝ ගෙවීමට අද වන විට හමුදා සෙබලුන්ට සිදුව තිබේ.

මෙම අනිවාර්ය නියෝගය හමුදපති බිරින්දෑ විසින් සිදුකරනු ලබන්නේ මෙවැනි කටයුතු සඳහා හමුදා සෙබලුන්ව යොදා ගැනිම මීට කලකට පෙර හමුදා මුලස්ථානය මඟින් තහනම් කර තිබියදීය. සෙබලුන්ට මාස දෙකකට වතාවක්වත් හමුදාවේ විවිධ අංශ වලින් පැවත්වෙන මෙවැනි අරමුදල් සොයා ගැනීමේ වැඩ සටහන්වලට නිරන්තරයෙන් ව්‍යාපාරිකයන් හමුවීමට හා තම හිතවතුන්ට ප්‍රවේශ පත්‍ර අලෙවි කිරීමට සිදුවීමෙන් වන අපහසුතාවය හා හමුදාවට වන අපහාසය මෙන්ම ඉලක්ක සපුරා ගැනීමට නොහැකි වීමෙන් වැ‍ටුපෙන් ඒ ගෙවීමට සිදුව තිබීම හෙතුවෙන් මේ තහනම් කළේය. මෙය තහනම් ක්‍රියාවක් බැවින් ප්‍රවෙශ පත්‍ර අළෙවි කිරීම සම්බන්ධයෙන් සෙබලුන් ගනනාවක්ම හමුදා පොලීසිය මගින් ප්‍රශ්න කිරීමද සිදුව තිබිණි.

හමුදාවේ රෙජිමේන්තු 25ක් හා බලඇණි 180 ක් පමණ තිබේ. ඒ අනුව මිලියන 18 ක පමණ මුදලක් මෙම ප්‍රසංගය වෙනුවෙන් එකතුකර දීමට හමුදා සෙබලුන්ට සිදුව තිබේ. මේ දමෙම ප්‍රවේශ පත් තොගය හමුදා රෙජිමෙන්තු වෙත ලබා දී තිබුණේ මීට සති දෙකකට පෙරය.

එමෙන්ම මෙම ප්‍රසංගයේ සම්බන්ධීකාරකයකු යැයි කියන හමුදාවේ නොවන පුද්ගලයකු සඳහා රුපියල් ලක්ෂ 5ක් ගෙවීමක්ද හමුදාවේ නොවන නිවේදකයාට ලක්ෂ දෙකහාමාරක ගෙවීමක්ද ලබා දි ඇතැයි පැවසේ.  නමුත් හමුදාව තුල මෙම කටයුතු සිදුකිරීමට සුදුසුකම් සැපිරූවන් ඕණෑවටත් වඩා සිටින බව රහසක් නොවේ. එමෙන්ම ගායක ගායිකාවන් සඳහා එක් අයකුට රුපියල් ලක්ෂ දෙකහාමරක් බැගින් ගෙවා ඇතැයිද දැන ගැනීමට තිබේ.

කෙසේ නමුත් මේ යුධ හමුදා පති බිරින්දෑගේ තනි තීරණයක් මත මෙම ප්‍රසංගය සංවිධානය කර ඇත. මේ බිරින්දෑගේ අත්ත්නොමතික කටයුතු ගැන හමුදාවේ සියලු සාමාජිකයන්ගේ පිලිකුල මේවන විට ජනාධිපතිවරයාට අගමැතිවරයාට ආරක්ෂක ලෙකම් වරයාට හා ඇගේ සැමියා වන හමුදාපති වරයා වෙත ද හමුදා සෙබලුන් විසින් ලිඛිතවම මේවන විට යොමු කර තිබේ.