15 වෙනි සියවසේදි පමණ බිහිවූ මෙම ඉවැන්ජලික ක්‍රිස්තියානි නිකාය හා ක‍තෝලිකයන් අතර දැඩි ආගමික ගට්ටනයක් එම ඉතිහාසය පුරාම තිබිණි. ක්‍රිස්තියානි නොවන අනෙක් ආගමිකයන් හා කතොලිකයන් එම නිකාය වෙත හරවා ගැනිම සඳහා ද්‍රව්‍යමය ප්‍රතිලාබ ලබා දෙමින් මූලධර්මවාදී ආගමික මතවාදයන් ප්‍රචාරය කිරීම නිසා ලෝක මට්ටමෙන්ම කතෝලික සභාව දැඩි අර්බුදයකට ගොස් ඇත. පසුගිය දශක කිහිපයක් පුරා මෙම ඉවැන්ජලිකයන් මෙරට ක්‍රියාත්මක වු අතර සමාජයේ විවිධාකාරයෙන් පීඩාවට පත්වූවන් එම ආගමික සභාව වෙත නම්මවා ගැනීම සම්බන්ධයෙන් බෞද්ධ හා හින්දු ආගමිකයන්ගෙන්ද චෝදනා එල්ලවී ඇත.
ශ්‍රිලංකා කා‍තෝලික සභාව මේ තත්වයට එරෙහිව ක්‍රියාත්මක වූ අතර එම ඉවැන්ජලික ආගමික සභාව මෙරට පිලිගැනිම වැලැක්වීම වෙනුවෙන් ක්‍රියාත්මක විය. එහෙත් වත්මන් පාලකයන් වෙතින් ඉවැන්ජලික සභාව පිලිගැනිමට ලක් කරන්නෙ නම් තව දුරටත් වත්මන් ආණ්ඩුව හා සහයෝගයෙන් කටයුතු කිරීම වෙනුවට එම තත්වයන් වෙනස් කර ගැනීම සඳහා කතෝලික සභාව දැඩි පියවර ගත යුතු බව එහි ප්‍රධානින්ගේ තීරණය වී තිබේ.
එසේම කතෝලික ප්‍රජාව වැඩි වශයෙන් ජිවත් වන ප්‍රදෙශයන් සම්බන්ධයෙන් මේවන විට පාරිසරික හා සමාජ අර්බුදවලට හේතුවක් බවට පත් වෙමින් තිබෙන කොළඹ මූල්‍ය නගරය ඉදිකිරීම, ඒකල කුණු ප්‍රශ්නය, පුත්තලම හොල්සිම් සිමෙන්ති කම්හලේ අපද්‍රවය ප්‍රශ්නය හා මීගමුව ආදි ප්‍රදේශවල සිදුවන වැලි කැපිම ආදි ගැටලු සම්බන්ධයෙන් ඊට විරෝධය පල කෙරෙන ජනතා උද්ඝෝෂණයන්ට සහය දීම හා ඒ වර්ධනය කෙරෙන ආකාරයෙන් කටයුතු කිරීමද ඉදිරියේදී සිදුකිරීම කෙරෙහි අවධානයද යොමුව පවතින බව වාර්තා වේ. පසුගියදා පැවැති ධීවර උද්ඝෝෂණයන්ට කතෝලික පල්ලියේ සහයෝගය හිමි වූයේද ඒ අනුවය. මේ සඳහා කොළඹ අගරදගුරු මැල්කම් කාදිනල් රංජිත් හිමිගේ ආශිර්වාදය ද හිමිව ඇති බව පැවසේ.
