තොරතුරු තාක්ෂණ වෘත්තීයවේදීන්ගේ සංසදයේ සභාපති කපිල පෙරේරා මහතා ලේකම් ලසන්ත වික්‍රමසිංහ මහතා විසින් රචිත මෙම කෘතිය තොරතුරු තාක්ෂණ වෘත්තීය වේදීන්ගේ සංසදයේ ප්‍රකාශනයකි. මෙම කෘතිය මඟින් එට්කා හිතවාදී අතළොස්ස විසින් පතුරුවමින් සිටින සාවද්‍ය මත සියල්ල ඛණ්ඩනය කෙරී ඇතැයි තොරතුරු තාක්ෂණ වෘත්තීයවේදීන්ගේ සංසදය පවසයි.
මෙහිදී සාහිත්‍ය සූරී ආචාර්ය ගුණදාස අමරසේකර, පේරාදෙණිය විශ්වවිද්‍යාලයේ හිටපු ආර්ථික විද්‍යා අංශයේ අංශාධිපති මහාචාර්ය සුමනසිරි ලියනගේ, හිටපු මහ බැංකු අධිපති අජිත් නිවාඞ් කබ්රාල්, යුතුකම සංවාද කවයේ සභාපති ගෙවිඳු කුමාරතුංග යන මහත්වරුන් විසින් සිය විචාරාත්මක අදහස් දැක්වීමට නියමිතය. මෙම උත්සවයේ මුලසුන හොඹවන්නේ වෘත්තිකයන්ගේ ජාතික පෙරමුණේ සභාපති විශේෂඥ වෛද්‍ය අනුරුද්ධ පාදෙනිය මහතා විසිනි.
ජාත්‍යන්තර වෙළඳාම පිලිබඳ ජාතික ප්‍රතිපත්තියක් සකස් කිරීමේ මහජන කොමිෂන් සහාවේ සාමාජිකත්වය දරමින් රටේ අවශ්‍යතාවය ඉටුකිරීමට ස්වේච්ඡාවෙන් සිදු කළ මෙහෙය අගය කරමින් කොළඹ විශ්ව විද්‍යාලයේ හිටපු උපකුලපති මහාචාර්ය ඩබ්. ඩී. ලක්ෂ්මන් සහ හිටපු නීතිපති ජනාධිපති නීතීඥ පාලිත ප්‍රනාන්දු මහතා ඇතුළු එම කොමිෂන් සභා සාමාජිකයින් වෙත මේ කෘතිය පුදනු ලැබේ.
