මේ රටේ නව ව්‍යවස්ථාවක් නොඉල්ලුවේ කවුද යන්න ප්‍රශ්නයට පැහැදිලිව දිය හැකි පිලිතුරක් තිබේ . ඒ නොඉල්ලපු කිසිවකු නැති බවය. 78 හඳුන්වා දුන් ව්‍යවස්ථාව 20 වන වතාවක් දක්වා සංශෝධනයට ලක් වූයේ ව්‍යවස්ථාවේ ඇති වැරදි නිසාය. මේ සංශෝධනයන්ට පාර්ලිමේන්තුව නියොජනය කළ සියලු මහජන නියොජිතයන් යම් ලෙසකින් හෝ සම්බන්ධව සිටියේය. රතන සාදුලාටද මේ මඟ හැර යෑමට හැකි වූයේ නැත. දැන් මොකුත් නොදන්නා බබ්බු ලෙස පෙනී සිටීමෙන් තමන්ගේ මොකක්ද එකක් රැකෙන බව රතන සාදුලා සිතා සිටියද ඒ එහෙම නොවන බව රටේ සමස්ත ජනයාම දන්න සත්‍යයකි.
ජේ ආර් ගේ ව්‍යවස්ථාව පරාජය කිරීම සඳහා සටන් ඇවිලුනේ ජේ ආර් බලයට එමටත් පෙර සිටය. ඇන් ඇම්ලා ඒ දවස් වලම මේ ව්‍යස්ථාව මඟින් ඇතිකරනු ලබන අර්බුධය පැහැදිලිව පෙන්වා දුන්නේය. ඊට විටින් විට කරන ලද එකතු කිරීම මඟින්ද ඇතිකරන ලද අර්බුධ වල නිමක් තිබුනේද නැත. විධායක ජනාධිපතිධුරය විසින් රටේ ඒකාධිපති පාලන ව්‍යුහයක් ඇති කිරීම නිසා සමස්ථ දේශපාලන දේහයටම බරපතල හානි ගෙන දුන්නෙය. දේශපාලන ගැ‍ටුම් හේතුවෙන් දසදහස් ගානන්කට ජීවිත නැති වුනේ මෙම ව්‍යස්ථාව නිසාය. මේ ගැ‍ටුම් නිසා රට තවදුරටත් ආපස්සට ගියා මිසක රටේ සංවර්ධනයට හේතු වූයේ නැත. මහා බරපතල දූෂණ වංචාවන්ට හේතු වූයේ මේ ධුරය වටා කෙන්ද්‍ර වූ බලය විසින් ඒ සියල්ල ගැට ගැසී තිබීම නිසාය. රාජ්‍ය සේවය දුර්වල වූයේ මේ බලය කෙන්ද්‍රගතව තිබීම නිසාය.
ජනතාවගේ පරමාධිපත්‍ය බලය එක පුද්ගලයකුගේ අභිමතාර්ථයන්ට යට කිරීම නිසා පුරවැසියා වහලකුගේ තත්වයට පත් විය. පාර්ලිමෙන්තුව, අධිකරණය ඊට හිමි ස්වාධීනත්වයෙන් ඉවත් කරනු ලැබීය. එමඟින් රාජ්‍යයේ මූලික නීතිය වූ ආණ්ඩුක්‍රම ව්‍යවස්තාව පවා හෑල්ලුවට ලක් කරන ලද අතර..අධිකරණද රූකඩ මඩුවක් බවට පත් කරනු ලැබීය. එමඟින් රටේ නීතියක් රීතියක්, නීතියේ යුක්තිය ක්‍රියාවට නැගීමේ සාධාරණ අවස්තා අහිමි කරනු ලැබීය. සමාජ සංස්කෘතික සම්බන්ධතා සියල්ල අයාලෙ ගියෙය. සහජීවනයෙන් ඉන්නට තැත් කළ සියලු ජාතීන් අතර විරසකයන් ඇති කර ඔවුනොවුන්ට විනාශය කැඳවීය.
දැන් අලුත් ව්‍යවස්ථාවක් ගෙනල්ල මේ අවුල් ජාලය ලෙහෙන එක කාගේ වුවමනාවක්ද? ව්‍යස්ථාව නිසා පිඩාවට පත් සියලු ජනතාවගේ වුවමනාව, ඒක නෙවෙයිද? එය මේ රටත් ජනතාවත් සුරකිනවා කියන තිස්තුන් කෝටියක් දෙවියන්ගේද වුවමනාව විය නොහැකිද ?
තමන්ගේ දේශපාලන පැවැත්ම අහෝසි වෙමින් යන විට කුමක් හෝ දේශපාලන තක්කඩි කමකින් බඩගෝස්තරය හොයා ගැනීමට තැත්කරන හොර ඝනගෙඩි තක්කඩියන්ගේ සටකපට කම්වලින් යළිත් විනාශ වන්නේ මේ රටය. රටවැසියාය, අනාගත දූ දරු පරම්පරාවය.
මේ පාපකර්මයට මෝඩ මිනිසුන්ව හවුල් කරගැනීමට හැකවීම ගැන ගැටලුවක් නැත. මන්ද ඒ මෝඩයන් නිසාය එහෙත් මහනායක හිමිවරුන්වද මේකට හවුල් කර ගැනීමට දරන වෙහෙස ගැන නම් ඇත්තේ මහනායක හිමිවරුන් ගැන අනුකම්පාවකි.
