උන් වහන්සේ මේ බව පැවසුවේ ඊයේ (07දා) බොරැල්ල බෞද්ධ මහා සම්මේලන ශ්‍රවණාගාරයේ පැවැති 'සිංහල භික්ෂු වංශයේ පුනරාගමනය'  බොදුබල සේනා සඟ සමුළුව අමතමිනි. 

රටට අවශ්‍ය පොදු අපේක්ෂකයකු නොව ජාතික නායකයෙකු බවත්, රජුන් තනන වැඩපිළිවෙළක් බොදුබල සේනා සංවිධානය විසින් ආරම්භ කරන බවත් බොදුබල සේනා සංවිධානයේ මහලේකම් ගලගොඩඅත්තේ ඥානසාර හිමියෝ පැවසූහ. 

ජාතික නායකත්වක් ලබා දිය හැකි  රාජ්‍ය නායකයකු බිහි කිරීම සඳහා සැප්තැම්බර  මාසයේදී කොළඹ දී  සංඝ සමුළුවක් කැඳවා රජුන් තනන වැඩපිළිවෙළ ආරම්භ කරන  බවද උන්වහන්සේ අවධාරණය කර සිටියහ. 


එහිදි වැඩිදුරටත් අදහස් දැක්වූ ඥානසාර හිමියෝ මෙසේද පැවසුහ. 

'අපේ භික්ෂු වංශය පිළිබඳ සිතිය යුතු කාලයකයි අපි සිටින්නෙ. අපි දැන් ඉවසුවා ඇති. සතර අතින් එන බලවේග රටේ සිවුකොණ කොල්ලකමින් ඉන්නවා. මේ ආණ්ඩුව හෝ රජයේ බලවත් අයට අදටත් බැරිවෙලා තියෙනවා බෞද්ධයන් ආරක්ෂා කරන්න. මේ ආණ්ඩුවෙන් අපි ඒක බලාපොරොත්තු වුණත් ඒවා වුණේ නැහැ. 


අද ජනාධිපතිවරයා, ත්‍රිවිධ හමුදාව ඇතුළු පහළ නිලධාරියා දක්වා සියලු දෙනා බලවත් රැවටීමක හෙවත් අල්ටකියාවක සිර වී සිටිනවා. අපේ නායකයන් සිටින සර්වාගමික යැයි කියන නාටකයට ඉඩදෙන්න බැහැ. පක්ෂ දේශපාලනයෙන් තොරව ජාතික දේශපාලන න්‍යාය පත්‍රයක් ඔස්සේ අපි කටයුතු කළ යුතුයි. 


අපේ දේශපාලනය ජාතික දේශපාලනයයි. අපට හොඳ ආර්ථිකයක් වගේම හොඳ දේශපාලනයක් අවශ්‍යයි. සංවර්ධනය සංවර්ධනය කියලා කොයිතරම් කෑ ගැහුවත් බොහෝ අංශවල සංවර්ධනයක් වෙලා නැහැ. හොරු තක්කඩින් පිරුණු, රට පිළිබඳ කිසිදු අදහස් නැති සමූහයක් දේශපාලඥයන් ලෙස ඉන්නවා''

මෙම නියෝජිත මහ සංඝ සමුළුව  සඳහා බොදුබල සේනාවේ සභාපති, එම  සංවිධානයේ නිර්මාතෘ කිරම විමලජෝති හිමියන් සහ ජාතික සංවිධායක  විතාරන්දෙණියේ  නන්ද හිමි  ඇතුළු භික්ෂුහු දෙසිය පණහක් පමණ සහභාගී වී සිටියහ.